Shkup, 09.05.2025 – Sot, në ambientet e Universitetit “Nënë Tereza” në Shkup, rektori Prof.dr. Bekim Fetaji priti në një takim pune Prof.dr. Naim Kryeziun nga Universiteti i Prishtinës.
Gjatë takimit, u diskutua për mundësitë e bashkëpunimit ndëruniversitar, shkëmbimet akademike, projektet e përbashkëta kërkimore dhe promovimin e vlerave të përbashkëta kulturore dhe shkencore në hapësirën shqipfolëse.
Rektori Fetaji, i shoqëruar nga dekani i Fakultetit të Shkencave Humane, Prof.dr. Mustafa Ibrahimi, dhe Prof.dr. Izer Maksuti, shprehën falënderim për vizitën dhe për angazhimin e vazhdueshëm të Prof.dr. Kryeziut në ndërlidhjen akademike mes institucioneve arsimore të larta.
Në këtë kontekst, u vlerësua lartë edhe promovimi i librit më të ri të Prof.dr. Naim Kryeziut, i cili përfaqëson një kontribut të rëndësishëm në fushën e përkthimit dhe pasurimit të fondit letrar dhe filozofik në gjuhën shqipe.
Nga ana e tij, Prof.dr. Naim Kryeziu përgëzoi rektorin Fetaji për detyrën e tij si udhëheqës i Universitetit “Nënë Tereza” dhe shprehu gatishmërinë për të thelluar bashkëpunimin në të ardhmen, në funksion të përbashkët të zhvillimit të arsimit dhe shkencës.
