Bashkimi Demokratik për Integrim (BDI) ka reaguar pas inaugurimit zyrtar të pikës së përbashkët kufitare “One-Stop-Shop” mes Kosovës dhe Maqedonisë së Veriut, duke theksuar se 90 për qind e punës për këtë projekt është realizuar gjatë kohës sa kjo parti ishte pjesë e qeverisë.
Sipas BDI-së, marrëveshja për këtë projekt strategjik për lehtësimin e qarkullimit ndërkufitar është nënshkruar gjatë mandatit të saj në pushtet, ndërsa qeveria aktuale ka kontribuar vetëm me një vonesë prej 9 muajsh në implementim.
“Të gjitha procedurat dhe marrëveshjet teknike, ligjore dhe ndërinstitucionale janë finalizuar në kohën kur BDI ishte pjesë e qeverisë. Qeveria aktuale nuk ka sjellë asgjë të re përveç një vonese të pajustifikueshme për zbatimin e projektit,” thuhet në reagimin e partisë.
BDI e konsideron përurimin e sotëm si një “kreditim të padrejtë politik” nga ana e qeverisë aktuale, duke rikujtuar se projekti “One-Stop-Shop” është produkt i një pune të gjatë dhe të koordinuar me institucionet e Kosovës dhe partnerët ndërkombëtarë.
Kjo pikë kufitare e përbashkët, e vendosur në Bllacë, synon të ulë ndjeshëm kohën e pritjes dhe të rrisë efikasitetin në kontrollin kufitar, duke ndihmuar në rritjen e shkëmbimeve tregtare dhe qarkullimit të lirë të qytetarëve.
