Bashkësia Lokale e Pallçishtit, në bashkëpunim me zv. ministren Kaltrina Zekolli, ka ndërmarrë të gjitha hapat institucionalë për përfundimin e projektit të ujësjellësit në këtë vendbanim. Ky projekt është i rëndësishëm për qindra familje dhe përbën një të drejtë themelore për një jetë dinjitoze.
Përkundër mbështetjes nga institucionet qendrore dhe angazhimit të bashkësisë lokale, projekti është bllokuar nga Kryetari i Komunës së Bogovinës. Ky vendim i papranueshëm dhe i paarsyeshëm tregon se kryetari ka zgjedhur të mbajë peng interesat publike për llogari të interesave të tij politike dhe personale.
Uji nuk është luks, është një nevojë themelore. Bllokimi i një projekti të tillë thelbësor është jo vetëm papërgjegjshmëri administrative, por gjithashtu një akt i pastër sabotimi ndaj qytetarëve që e kanë zgjedhur këtë kryetar për t’i shërbyer atyre, dhe jo për të ndaluar zhvillimin.
Refuzimi për të dhënë lejen për vazhdimin e punimeve nuk është rastësor. Ky është një përdorim i zakonshëm i nevojave elementare të qytetarëve si mjet manipulimi dhe propagande për zgjedhje, një praktikë që ka dominuar veprimtarinë e partisë së Kryetarit të Komunës.
Ne bëjmë thirrje për reagim nga të gjitha institucionet përgjegjëse, por gjithashtu i bëjmë thirrje opinionit publik që të ngrihet ndaj kësaj padrejtësie.
Pushteti nuk është pronë personale dhe pengimi i zhvillimit të shoqërisë është një cenim i rëndë i interesit publik.
Qytetarët e Pallçishtit nuk do të heshtin përballë padrejtësisë. Ata janë qytetarë që kërkojnë shërbime të drejta dhe zhvillim, dhe nuk do të pranojnë që kryetari të përdorë mungesën e ujit si vegël për manipulim politik.
Pengimi i ujësjellësit është një akt i turpshëm që tregon se për Kryetarin e Komunës së Bogovinës, interesat e qytetarëve janë më pak të rëndësishme se propaganda politike e partisë së tij, BDI-së.
