Izet Mexhiti tha se VLEN është formuar si antipod i BDI-së dhe votat i kanë kërkuar për ndryshim dhe rotacion politik, që siç thotë, duhet t’i dalin zot kësaj pune pasi asnjëra parti nuk i ka fituar votat e vetme, shkruan Tv21. Mexhiti tha se votat e VLEN-it nuk janë të përcaktuara politikisht që siç thotë, nëse e marrin parasysh këtë, nuk duhet të ndahen në kohë stabile kur në kohë të vështira janë bërë bashkë.
“VLEN-I është formu si antipod i BDI-së. Votat i kemi kërkuar për ta sjell ndryshimin, për ta sjell rotacionin politik dhe këtë e vlerëson dhe z.Taravari mirëpo meqë i kemi marrë votat, e kemi marrë përgjegjësinë, duhet t’i dalim zot kësaj pune sepse asnjëri prej neve nuk i kemi fituar këtë vota vetë, as Lëvizja Demokratike, as ajo gjysma e Aleancës për Shqiptarët, as Besa e as Alternativa, as Vetëvendosja por të gjithë bashkë dhe ka një kuantum votash të cilat nuk janë të përcaktuar partiakisht por kanë votuar për ndryshim, për rotacion politik, për konkurrencë politike. Dhe nëse e kemi parasysh këtë, kur në kohë të vështirë jemi bërë bashkë nuk është mirë tash në kohë stabile të ndahemi”, tha Mexhiti.
