Mbrëmë, në Qendrën Kulturore “Malësia” u shënua 6 prilli – datë e rëndësishme historike në shtetformimin e Shqipërisë, respektivisht datë që kujton heroizmin e pashoq të Dedë Gjon Lulit, i cili edhe sot 114 vjet pas ngritjes së flamurit kombëtar vazhdon të mbetet i gjallë përmes veprimtarisë së tij e cila bën krenarë çdo shqiptar!
Shqiptarët në Mal të Zi janë avancuar jashtëzakonshëm shumë në statusin e tyre dhe kjo është arritur falë një rruge të trasuar nga Dedë Gjon Luli që mbetet busull e orientimit kombëtar për çdo malësor! Sot zv. kryeministri i Malit të Zi është shqiptar – Nik Gjeloshaj, ish kryetar i Komunës së Tuzit, nënkryetar i Parlamentit është Nikollë Camaj! Sot me dinjitet është prezente edhe gruaja shqiptare në institucionet e vendit si Marina Ujkaj e cila u mor organizimin e kësaj ngjarje!
Kjo arritje shqiptare u ndje edhe mbrëmë në Qendrën Kulturore “Malësia” ku jehoni këbga e vallja shqipe për Dedë Gjon Lulin!
Besiana Mehmedi dhe Shkodran Tolaj ndanë momente të paharruara për publikun që i mikëpriti dhe duartrokiti gjatë performancës 30 minutëshe përmes së cilës u përçua bukur mesazhi i bashkimit shqiptar!
Në program u paraqitën edhe ansamblet e vendit: “Koha” nga Dinosha, “Dedë Gjon Luli” nga Tuzi si dhe Rugova” nga Kosova që e mbushën skenën me kolorit të jashtëzakonshëm të veshjeve, këngëve e valleve tona autoktone!
Për historikun e kryengritjes së Malësisë mbajti fjalim Dr.Muhamet Meta, anëtar i Akademisë së Arteve e Shkencave të Kosovës i cili e vlerësoi lartë figurën e heroit të popullit Dedë Gjon Luli!
