Bashkësia Fetare Islame (BFI) në Maqedoninë e Veriut nuk është thjesht një institucion fetar, por një shtyllë jetike e identitetit dhe ekzistencës islame në këtë vend. BFI nuk është thjesht një organizatë që administron xhamitë, por një institucion me ndikim të thellë në jetën e besimtarëve. Roli i saj shtrihet nga edukimi fetar dhe arsimor deri te çështjet sociale dhe humanitare. Medresetë që mbikëqyr, përveçse formojnë dijetarë të ardhshëm, shërbejnë si qendra edukimi ku të rinjtë mësojnë vlerat e tolerancës, respektit dhe përgjegjësisë shoqërore. Fakulteti i Shkencave Islame, si institucioni më i lartë akademik i islamit në vend, përgatit liderët fetarë dhe intelektualë të së ardhmes, të aftë për të përballuar sfidat e kohës moderne.
Duke mbajtur pesë medrese, Fakultetin e Shkencave Islame (FSHI) dhe mbi 700 xhami në gjithë vendin, BFI është një shtyllë e identitetit fetar dhe kulturor për mijëra qindra qytetarë. Përveç rolit të saj fetar dhe edukativ, ky institucion është një nga punëdhënësit më të mëdhenj në vend, me mbi 1,200 të punësuar si imamë, mualimë dhe hatibë, si dhe 200 të tjerë që shërbejnë si profesorë në FSHI, medrese apo në administratën udhëheqëse.
Ajo që e bën këtë institucion edhe më të veçantë është fakti se nuk merr asnjë ndihmë nga shteti. Asnjë ndihmë nga jashtë, as nga Lindja, as nga Perëndimi. Gjithë kjo barrë, gjithë kjo përgjegjësi, mbahet mbi supet e besimtarëve, mbi xhematin, mbi ata që me dashuri dhe përkushtim japin kontributin e tyre për të siguruar që drita e Islamit të mos shuhet. Dhe ky është një ndër xhematet më të mëdha që mund të ekzistojë, një bashkësi e vetëdijshme, e cila nuk pret, por vepron, e cila nuk kërkon ndihmë nga jashtë, por e ndërton forcën e saj nga brenda.
Burimet kryesore për të mbajtur këtë institucion të shenjtë janë kontributet e xhematit: anëtarësia, zeqati, fitri, kurbani, vakëfi dhe haxhi. Këto janë shtyllat mbi të cilat mbështetet ekzistenca e BFI-së dhe funksionimi i saj i përditshëm. Janë burime të pastra, të ndershme, të mbështetura mbi parimet e Islamit dhe mbi vullnetin e besimtarëve. Dhe secili që guxon të “fusë duart” në këto burime, secili që përpiqet të cënojë integritetin e tyre, është një dashakeq, një armik i vetë ekzistencës islame në Maqedoninë e Veriut.
BFI nuk është vetëm një organizatë që menaxhon çështjet fetare. Ajo është një institucion që përkujdeset për edukimin, për shërbimin social, për ruajtjen e moralit dhe unitetit të shoqërisë myslimane. Përmes sistemit arsimor islam, duke filluar nga 400 e saj mektebe, duke vazhduar me medresetë dhe FSHI-në, ajo përgatit brezat e ardhshëm të dijetarëve të profileve të ndyshme, të cilët jo vetëm që do ta ruajnë traditën, por do ta zhvillojnë më tej atë në sfidat e kohës moderne.
Në aspektin social, BFI ka një ndikim të thellë në jetën e përditshme të myslimanëve në Maqedoninë e Veriut. Përmes rrjetit të saj të xhamive dhe imamëve, ajo nuk është vetëm një hapësirë adhurimi, por një qendër për ndihmë, këshillim dhe përkrahje për qytetarët. Kur ndodhin fatkeqësi natyrore, kriza ekonomike apo probleme sociale, shpesh janë xhamitë dhe strukturat e BFI-së ato që mobilizojnë ndihma dhe solidaritet.
Përtej rolit të saj fetar dhe social, BFI gjithmonë ka pasur një dimension politik dhe diplomatik. Si një nga institucionet më të vjetra dhe më të rëndësishme të myslimanëve në vend, ajo është një faktor kyç në dialogun me autoritetet shtetërore dhe ndërkombëtare për çështje që prekin shoqërinë myslimanе. Për këtë arsye, integriteti i saj është jetik për besimin që besimtarët dhe shoqëria në përgjithësi kanë ndaj saj.
Në një shoqëri ku vlerat fetare shpesh sfidohen nga materializmi dhe tendencat e huaja, BFI është fortesa që mbron besimin, dinjitetin dhe unitetin e myslimanëve. Ajo nuk i përket një individi, një grupi apo një interesi të caktuar , ajo është pasuria e të gjithë besimtarëve. Çdo sulm ndaj saj është një sulm ndaj vetë qytetarëve, ndaj xhematit, ndaj atyre që e mbajnë me mund e sakrificë.
Ruajtja dhe forcimi i këtij institucioni nuk është vetëm një detyrë e administratës së tij, por është përgjegjësi e çdo myslimani të ndërgjegjshëm. Kontributi nuk është vetëm financiar, por edhe moral, shpirtëror dhe shoqëror. Sepse një institucion i fuqishëm fetar është një garanci për një shoqëri më të drejtë, më të moralshme dhe më të qëndrueshme. Dhe në këtë rrugë, Bashkësia Fetare Islame vazhdon të qëndrojë e palëkundur, duke u mbështetur vetëm te besimi, përkushtimi dhe mbështetja e xhematit të saj.
Sepse pesha e një institucioni nuk matet vetëm me statutin dhe historinë e tij, por me ndikimin që ka në jetën e njerëzve të cilëve u shërben.
Autor: Driton Dikena