Të nderuar qytetarë të Çairit,
Pas konsultimeve të gjera me Kryetarin, kryesinë dhe strukturën organizative të degës dhe Këshillit Vendor përkatës, sot, në prani të Kryetarit të Këshillit Vendor “Femi Lladrovci”, Nafit Elmazi me shumë kënaqësi emërova Docent. Dr. Amela Cana si Shefe të Shtabit Politik të Këshillit Vendor “Femi Lladrovci” në Çair.
Ky është një moment i veçantë, jo vetëm për organizimin tonë politik, por edhe për vetë shoqërinë tonë, pasi për herë të parë një grua, nënë, mjeke dhe profesoreshë universitare do të udhëheqë një Shtab Politik të Këshillit Vendor.
Doc. Dr. Amela Cana është një specialiste e shquar në fushën e ortodoncisë, me një karrierë të gjatë dhe të pasur si pedagoge dhe udhëheqëse në sektorin shëndetësor dhe akademik.
Ajo ka dhënë një kontribut të rëndësishëm në fushën e shëndetësisë, duke drejtuar me sukses Klinikën Shëndetësore Universitare “Shën Pantelejmon” në Shkup si dhe duke qenë një udhëheqëse e suksesshme në Fondin e Sigurimit Shëndetësor të Maqedonisë.
Përveç përvojës së saj në menaxhimin shëndetësor, ajo është një profesoreshë e përkushtuar në Fakultetin e Stomatologjisë në Universitetin e Tetovës dhe në Universitetin Ballkanik.
Përparimi i një shoqërie matet me hapësirën dhe mundësitë që ajo u jep grave të afta dhe të përkushtuara për të udhëhequr. Sot, ne bëjmë një hap të rëndësishëm në këtë drejtim, duke i besuar një gruaje të shquar një detyrë kaq të rëndësishme.
I uroj shumë suksese në këtë rrugëtim të ri, duke besuar se angazhimi i saj do të sjellë rezultate të shkëlqyera për komunitetin tonë!
