Më 11 Mars / 11 Ramazan (e martë), Rijaseti i Bashkësisë Fetare Islame të RMV – së, në bashkëpunim me Muftininë e BFI – Gostivar, duke ju përmbajtur plan-programit të saj, vazhdoi me sukses aktivitetin e saj, “Mbrëmje Kur’anore”, i cila u realizua në Xhaminë e Vjetër të fshatit Çegran-Gostivar.
Mbrëmjet Kur’anore janë kënaqësi në vete, mirëpo kur këto realizohen në qytete historike siç është qyteti i bujarisë dhe i mikëpritjes dhe në xhami të mbushura me përshpirtshmëri dhe me një atmosferë impozante siç është Xhamia e Vjetër e Çegranit, përjetohet ndjesia e të rikthyerit prapa në kohë të arta, ku në këtë xhami kanë kryer shërbimin fetar alimët e kohës.
Nën organizim të Rijasetit të Bashkësisë Fetare Islame të RMV – së, të udhëhequr nga Muftiu i Muftinisë së BFI – Gostivar, H. Sabahudin ef. Zendeli, dhe në prezencë të përfaqësuesit të Rijasetit të BFI e RMV – së, drejtorit të sektorit fetaro – arsimor, Mr. Fejzulla Sadiki, drejtorit për shkencë dhe kulturë, Mr. Musanif Rufati, të përgjegjësit të administratës së Fakultetit të Shkencave Islame – Shkup, Sulejman ef. Idrizi, Ulemave Islam dhe të shumë xhematlinjëve dhe dashamirëve të Fjalës së Allahut të Lartmadhëruar, këtë mbrëmje e begatuan me zërat e tyre lexuesit më të spikatur të këtij nënqielli dhe jo vetëm:
1. Hfz. Fatih Derdiyok
2. Hfz. Xhemail Nuhiju
3. Hfz. Idriz Osmani
4. Mr. Elyesa Asani
Programin e moderoi referenti i kësaj Muftinie, H. Mallzim ef. Zendeli, kurse të pranishmive i’u dëshiroi mirëseardhje imami i Xhamisë, Mr. Xhevdet ef. Neziri.
Të pranishmit, në emër të kryetarit të Bashkësisë Fetare Islame të RMV-së, Reisul Ulema H. Hfz. Shaqir ef. Fetai, i përshëndeti Muftiu i Gostivarit, H. Sabahudin ef. Zendeli, i cili e pati edhe fjalën e tij të rastit në cilësinë e nikoqirit.
Në vazhdim, namazit të teravisë i prinë hafizlerët e nderuar, të cilët bënë që namazi i teravisë të shijojë krejtësisht ndryshe.
Allahu ju bekoftë!
