Emshi Ibin, familjari i dy viktimave të tragjedisë së spitalit modular të Tetovës, ka reaguar publikisht ndaj zvarritjeve të vazhdueshme nga Gjykata e Tetovës dhe ndaj mosinteresimit të Prokurorisë Publike për këtë rast.
Në reagimin e tij përmes rrjeteve sociale, Ibin shprehet se këto vonesa janë metoda të njohura të sistemit gjyqësor në Maqedoni, të cilat vjetrojnë qëllimisht lëndët dhe i lënë fajtorët të pandëshkuar. Ai gjithashtu akuzon ish-koalicionin qeveritar BDI-LSDM për përgjegjësi të drejtpërdrejtë në ndërtimin e spitaleve modulare pa standarde evropiane, gjë që rezultoi në tragjedinë e rëndë.
“Zvarritjet dhe mungesa e drejtësisë vetëm sa nxisin më tej krimin dhe korrupsionin në vend. Këto metoda jo vetëm që pengojnë drejtësinë, por edhe e inkurajojnë fajtorin të vazhdojë i pandëshkuar,” tha ai.
Emshi Ibin i bën thirrje qeverisë aktuale dhe Ministrisë së Drejtësisë që të ndërhyjnë dhe të sjellin drejtësi për viktimat dhe familjet e tyre. Ai paralajmëron se në rast të mosveprimit, qytetarët do të jenë të detyruar të organizojnë protesta dhe të shprehin mosbindje qytetare.
“Përgjegjësia për drejtësinë është e qeverisë aktuale. Nëse edhe ky rast kalon si të tjerët, atëherë do të detyrohemi të reagojmë me protesta,” theksoi Ibin, duke shprehur shpresën që apeli i tij të mos hasë në vesh të shurdhër.
