Forumi për Ndryshime në Arsim kërkon që pas përfshirjes në listën e zezë amerikane për korrupsion Artan Grubi të mos ligjëroj në Universitetin e Tetovës. Sipas tyre, Artan Grubi ka shkelur çdo parim të ndershmërisë dhe prezenca e tij në radhët e profesorëve komprometon vlerat themelore të integritetit akademik.
Ata vlerësojnë se me ligjërues si Artan Grubi, mesazhi që ju dërgohet studentëve është që ata mund të jenë të suksesshëm vetëm nëse shkelin mbi çdo vlerë.
“Arsyeja pse Artan Grubit nuk duhet t’i riaktivizohet pozita si profesor në drejtimin gazetari në UT është sepse vlerat e tij si profesor dhe integriteti i tij amerikan është i komprometuar për vet faktin se gjendet në listën e zezë amerikane për korrupsion të theksuar dhe përzierje në gjyqësor. Ai nuk mund të jetë shembull për studentët dhe s’mund të ligjërojë përveç përhapjes se si bëhet korrupsion në vend”, tha Blendi Hodai, kryetar i Forumit për Ndryshime në Arsim.
Nga Forumi për Ndryshime në Arsim thonë se Grubi është në proces të marrjes së titullit docent, në fakultetin juridik, drejtimi gazetari. Ata kërkojnë që UT-ja t’ia refuzojë këtë kërkesë.
“Ka kërkuar, ka filluar procesin për avancim në thirrjen akademike docent, e njëjta nuk duhet ti procesohet dhe ti pranohet për faktin se do të vendohet një precedent shumë negativ në të ardhmen për Institucionet arsimore pasi do tu bëjmë me dije studentëve dhe të rinjve në vend që mundemi të kemi sukses në vend, vetëm nëse mund t’i korruptojmë gjykatësit e prokurorët dhe nëpërmjet ryshfetit mund t’i arrini gjitha qëllimet që keni në jetë. Ri-inkuadrimi i tij në UT do t’i demotivojë studentët dhe do ta normalizojë sjelljen korruptive të një personi konkretisht Artan Grubit në shoqërinë tonë”, shtoi Blendi Hodai, kryetar i Forumit për Ndryshime në Arsim.
Të njëjtën kërkesë si të studentëve e kanë edhe partitë shqiptare në pushtet. Nga VLEN thonë se Universiteti i Tetovës, i ndërtuar me sakrificën e popullit shqiptar duhet ta mbajë larg Artan Grubin, pasi ai ka keqpërdorur pozitën e tij nga shërbyes publik është shndërruar në shërbyes të Sasho Mijallkovit.
Hija e Ali Ahmetit, Artan Grubi, tani i shpallur nga Departamenti Amerikan i Shtetit si person i përfshirë në korrupsion për ta shpëtuar Sasho Mijallkovin, nuk ka vend në mesin e studentëve. Studentët janë e tashmja dhe e ardhmja e këtij vendi. Ata kanë të drejtë të edukohen dhe të formohen nga figura që janë shembuj të ndershmërisë, profesionalizmit dhe integritetit. Bedeli i Ali Ahmetit, Artan Grubi nuk mund të jetë një udhërrëfyes për të rinjtë e këtij vendi”, thonë nga VLEN.
VLEN
Artan Grubi nuk ka vend në mesin e studentëve
Grubi s’mund të jetë udhërrëfyes për të rinjtë
Në reagimin e tyre, partitë shqiptare në pushtet thonë se personazhi i fundit në listën e zezë, Artan Grubi, nuk mund të amnistohet me një status në Facebook ku thotë se tërhiqet nga jeta publike. Departamenti amerikan i Shtetit njoftoi të hënën se i ka futur në listën e zezë të Shteteve të Bashkuara ish-zëvendëskryeministrin e Maqedonisë së Veriut, Artan Grubi, si dhe gjykatësin e Gjykatës së Apelit, Enver Behxheti, për shkak të përfshirjes në “korrupsion të madh”. /Alsat.mk