Kryetari i Bashkësisë Fetare Islame të Republikës së Maqedonisë së Veriut, Reisul Ulema H. Hfz. Shaqir ef. Fetai, priti në kabinetin e tij shefin e zyrës së sektorit për Europë të Shoqatës Rahma International Society, z. Waleed Khaled Alyaseen, i shoqëruar nga hoxhë Rufat ef. Sherifi.
Reisul Ulema duke i dëshiruar mirëseardhje në vendin tonë, fillimisht falenderoi mysafirin e nderuar për respektin e treguar ndaj institucionit më të lartë fetar në vend.
Në këtë takim, Reisul Ulema H. Hfz. Shaqir ef. Fetai e njoftoi z. Alyaseen për aktivitet humanitare dhe të bamirësisë me të cilat angazhohet Bashkësia Fetare Islame e RMV – së, si dhe theksoi rëndësinë e bashkëpunimit ndërkombëtar për projekte humanitare dhe arsimore.
Gjatë bisedës, të dyja palët diskutuan për përpjekjet e përbashkëta në ndihmën për shtresat në nevojë, me fokus të veçantë në projektet arsimore dhe zhvillimore të institucioneve cilat janë nën administrim të Bashkësisë Fetare Islame të RMV – së.
Reisul Ulema shprehu mirënjohjen për ndihmën dhe mbështetjen e Rahma International Society në realizimin e iniciativave që kontribuojnë në përmirësimin e kushteve të jetesës dhe përhapjen e vlerave islame.
Nga ana tjetër, z. Waleed Khaled Alyaseen pasi falenderoi Reisul Ulema H. Hfz. Shaqir ef. Fetain për pritjen e ngrohtë, riafirmoi përkushtimin e Shoqatës Rahma International Society për të vazhduar mbështetjen e projekteve që fuqizojnë komunitetet dhe promovojnë solidaritetin global.
Ky takim është një hap i rëndësishëm në forcimin e marrëdhënieve midis Bashkësisë Fetare Islame dhe organizatave ndërkombëtare që punojnë për kauza humanitare.
Në fund të takimit, Reisul Ulema në shenjë respekti dhe mirënjohjeje mysafirëve ju dhuroi nga një libër.
