Deputetja e BDI-së, Rina Ajdari, mori pjesë në Asamblenë e Iniciativës së Evropës Qendrore, me ç’rast pati diskutim ku ka theksuar se sfidat e rajonit gjejnë zgjidhje me bashkëpunim, veprim të organizuar e të harmonizuar.
Deputetja Ajdari ka theksuar se “Maqedonia e Veriut duhet sa më parë të zhbllokojë procesin e integrimit e të fillojë bisedimet me Bashkimin Evropian”.
Postimi i plotë i saj:
Në Tiranë, më 30 shtator -1 tetor u mbajt Asambleja Parlamentare e Iniciativës së Evropës Qendrore (CEI) në të cilën ishim pjesëmarrës si delegacion nga Maqedonia e Veriut krahas delegacioneve nga Italia, Polonia, Hungaria, Bosnja dhe Hercegovina, Kroacia, Sllovenia, Bullgaria, Sllovakia, Mali i Zi, Rumunia, Ukraina dhe Shqipëria si vend nikoqir.
Në fjalën time, fillimisht urova deputetët e Kuvendit të Shqipërisë për hapjen e bisedimeve me Bashkimin Evropian, më pas theksova që duhet të marrim parasysh të gjitha sfidat me të cilat përballemi si shtete por edhe si rajon dhe më gjerë, siç janë kërcënimet ndaj paqes botërore, sfidat energjetike, përparimi i shpejtë teknologjik dhe globalizimi – sepse të gjitha këto kërkojnë bashkëpunim, veprim të organizuar e të harmonizuar. Kjo në thelb është arsyeja pse këto nisma bashkëpunimi janë shumë të rëndësishme, sepse vetëm së bashku mund t’i tejkalojmë më mirë dhe me sukses të gjitha sfidat me të cilat përballemi. Ndërsa Maqedonia e Veriut duhet sa më parë të zhbllokojë procesin e integrimit e të fillojë bisedimet me Bashkimin Evropian.
