“Provokim nga Siljanovska” është komenti i disa mediave greke në tekstet për inaugurimin e presidentes së re Gordana Siljanovska Davkova për shkak se gjatë deklaratës solemne ajo nuk e përmendi emrin kushtetues – Republika e Maqedonisë së Veriut.
Anashkalimi i emrit Maqedonia e Veriut, gjatë betimit solemn dhe fjalimit në Parlament të Presidentes së re, Gordana Siljanovska Davkova, bëhet lajm dite në Greqi.
“Kursi evropian i RMV-së varet nga përdorimi i emrit kushtetues” – ka qenë reagimi i menjëhershëm I Ministrisë së Jashtme greke.
Athina zyrtare thotë se veprimet e Siljanovskës, paraqesin shkelje të marrëveshjes dhe Kushtetutës, duke rikujtuar se Qeveria greke përkundër ankesave që i pati si opozitë, respekton Marrëveshjen si ndërkombëtarisht të ratifikuar, që mbizotëron çdo dispozitë tjetër ligjore.
“Kjo procedurë qartazi shkel Marrëveshjen e Prespës, por edhe Kushtetutën e shtetit fqinj, që është i harmonizuar me obligimet e saja ndërkombëtare. Marrëdhëniet dypalëshe dhe rruga evropiane e Maqedonisë së Veriut varen nga zbatimi i plotë i Marrëveshjes së Prespës dhe përdorimit të emrit kushtetues”, thanë nga MPJ e Greqisë.
Ambasadorja e Greqisë në Shkup, Sofija Filipidu, edhe pse e ftuar në seancën e Kuvendit për të ndjekur betimin e Presidentes së re Gordana Siljanovska, në shenjë revolte dhe proteste, braktisi Parlamentin.
Gazeta greke “Katimerini” shkruan se ka patur direktivë relevante nga Ministria e Jashtme greke.
“Katimerini” ka rikujtuar edhe deklaratën e fundit të Kryeministrit grek, Kirjakos Micotakis, lidhur me Marëveshjen e Prespës, se me shqetësime ka ndjekur deklaratat e disa funksionarëve të VMRO-së gjatë fushatës zgjedhore dhe se është në pritje të qëndrimit zyrtar të qeverisë së re lidhur me emrin e shtetit.
Maqedonia e Veriut: Provokim nga presidentja e re– e quajti vendin Maqedoni”, “Maqedonia e Veriut: Ambasadorja greke u largua nga inaugurimi”, “Maqedonia e Veriut: Gordana Siljanovska e quajti Maqedoni”, “Maqedonia e Veriut: E tha dhe atë e bëri presidentja e re”, janë disa nga titujt në edicionet onlajn të mediave greke./tvklan.mk/