Në një deklaratë të fundit në Facebook, analisti politik Arben Ratkoceri ka shprehur mendimin e tij mbi dinamikat politike aktuale në Maqedoninë e Veriut. Sipas Ratkocerit, partia VMRO-DPMNE po përdor retorikë që jo vetëm fuqizon Bashkimin Demokratik për Integrim (BDI), por gjithashtu po margjinalizon Lëvizjen Besa (VLEN), duke iu ofruar atyre simbolikisht “Ministrinë e Byrekut”.
Ratkoceri argumenton se kjo strategji mund të çojë në mohimin e të drejtave themelore të shqiptarëve për liri dhe demokraci, veçanërisht të drejtën e zgjedhjes për përfaqësim. Ai paralajmëron se kjo mund të rikthejë situatën e shqiptarëve në Maqedoni në periudhën para viteve 90, kur përfaqësimi i tyre nuk ishte i bazuar në zgjedhjen e tyre, por në preferencat e maqedonasve dhe serbëve.
Më tej, Ratkoceri thekson se ka një tendencë për të shkatërruar organizimin serioz politik të shqiptarëve, në një mënyrë të ngjashme me çfarë ndodhi me Partinë për Prosperitet Demokratik, Partinë Demokratike Shqiptare dhe Aleancën e Shqiptarëve. Ai kritikon LSDM dhe VMRO-DPMNE për të ndërruar vetëm pozicione mes tyre që nga fillimi i viteve ’90 dhe për të ndarë plaçkën e shtetit në mënyrë ciklike me marrëveshje të heshtur.
“VMRO me retorikë po fuqizon BDI-në ndërsa po e defaktorizon VLEN-in që më pas t’ua ofrojë Ministrinë e Byrekut.
Epilogu: shqiptarëve t’u mohohet e drejta kryesore e lirisë dhe e demokracisë siç është ajo e zgjedhjes për përfaqësim, dhe njëkohësisht t’i kthejë para viteve ’90-ta, kur kjo e drejtë u zëvendësohej me shqiptarët që ju pëlqenin maqedonasëve e serbëve e jo me ata që i zgjedhin vetë shqiptarë me shumicë.
Po ashtu tendenca është që të defaktorizohet e shkatrrohet organizimi serioz politik i shqiptareve ne Maqedoni , në të njejtën mënyrë siç u bë me Partinë pë Prosperitet Demokratik, Partinë Demokratike Shqiptare e Alenacën e Shqiptarëve kurse LSDM dhe VMRO, që nga 90-ta e këndej vetëm se i ndrrojnë pozicionet dhe funksionojnë si është më së miri pa harruar ndarjen e plaçkës të shtetit në mënyrë ciklike mes veti me marrëveshje të heshtur !”, tha Ratkoceri.