Portali Kurir ka publikuar një storie për Orhan Musevski nga Maqedonia e Veriut, i cili punon në një restorant të famshëm të ushqimit të shpejt në qendër të Berlinit.
Atraksionet që duhen parë si turistë nuk kanë shumë rëndësi për Orhanin. Ai pothuajse nuk i vë re më sepse vjen në vendin e punës pesë herë në javë nga periferia e Berlinit.
“Këto dy vite në Gjermani morën pesë vjet nga jeta ime! Nuk më pëlqen fare sistemi i jetës këtu. Maqedonia ka një klimë më të mirë, njerëzit ndryshe, unë isha më i lumtur në vendin tim, më i kënaqur… Në vendin tonë është vërtet më mirë se kudo…Këtu ka pak buzëqeshje të sinqerta, dhe besojnë vetëm në para”, thotë Orhani.
Ai shton se as për shumë gjermanë nuk është e lehtë.
“Për dikë si unë janë të rezervuara punët më të këqija, nga të cilat nuk ka asnjë shans të ia dalësh si dikur apo të blesh një apartament apo makinë të re. Kur më marrin 600 euro taksë nga rroga, më mbesin 1500 euro dhe 600 euro të tjera shkojnë vetëm për një dhomë 15 metra katrorë. Në dimër, për shkak të rritjes së shpenzimeve për ngrohje, qiradhënësi kërkon 650 euro. Kur erdha pagova 350 euro për një akomodim të tillë, por më pas filloi lufta në Ukrainë, u shtrenjtua dhe tani as 100 euro nuk arrij të ndaj”, thotë emigranti nga Maqedonia e Veriut.
Ai shton se dëshira për një jetë më të mirë e solli në Gjermani, por edhe një problem specifik shëndetësor. Ai e zgjidhi me sukses dhe tregon me krenari certifikatën e tij shëndetësore, falë së cilës nuk ka paguar nga xhepi i tij për procedurën dhe injeksionet e shtrenjta.
Ai është mirënjohës për këtë, por gjithsesi i është mërzit Gjermania.
“Së shpejti do të kthehem në Ballkanin tonë dhe në Maqedoninë time! Aty edhe lulet nuhasin ndryshe”, Orhani është nostalgjik. “Unë jam tetë orë e gjysmë në punë dhe më së shumti punoj me njerëz nga Shqipëria, Nigeria, India… Jemi vazhdimisht nën kamera që të mos ulet njeri rastësisht. Unë udhëtoj më shumë se një orë në banesë, ndaj kuzhinën dhe banjën me katër njerëz tanë nga Maqedonia, Kroacia dhe Serbia dhe të gjithë ndjehen njësoj si unë. Në shtëpi, televizionet tona tregojnë vetëm negativitet dhe ne besuam se ishte më mirë këtu. Por edhe këtu ka shumë negativitet, vetëm se nuk është aq i spikatur”, thotë Orhani, i cili luante futboll në Maqedoni.
Ai thekson se pasi të pushojë pak në vendlindje, do të mendojë sërish për të punuar jashtë vendit, por këtë herë diku më afër shtëpisë, në Ballkan, sidomos në rivierën e Adriatikut në sferën e turizmit dhe gastronomisë.
“Ata janë më të kënaqur se unë në Gjermani. Punojnë nga qershori deri në fund të shtatorit dhe rroga në Kroaci siç më kanë thënë është 1000 euro. Ata marrin edhe akomodim dhe ushqim falas dhe ato 1000 euro mbeten të pastra për ta”, përfundon Orhan.
Mesatarja e punëtorëve mysafirë në Gjermani, le të kujtojmë, fiton nga 1500 deri në 4000 euro dhe shumë prej tyre nuk planifikojnë të kthehen derisa mund të punojnë.