Koment : Top-shqip.mk
Sot, të thuash Bujar Osmani, ke theksuar një personalitet human, mjek, kirurg, prind, aktivist politik, lider i sprovuar i institucionit ndërkombëtar, lider i institucionit më kredibil të Maqedonisë së Veriut, të thuash Bujar, ke thënë atdhetar e largpamës, në konstelacionet e ndërlikuara ballkanike.
Por, të thuash Bujar Osmani kandidat për president, ke cekur përkushtim, unitet qytetar dhe dëshminë e një personaliteti të rrallë të politikës shqiptare në Maqedoninë e Veriut, ish ministër Shëndetësisë, ish zëdhënës i BDI-së, ish kryesues i OSBE-së, posti më i lartë i një shqiptari nga Maqedonia e Veriut, ministri i parë shqiptar i Punëve të Jashtme të Maqedonisë.
Biografia e tij, jep shpresë për një profil në ardhje, të një politikani të shkëlqyer, të besueshëm, të baraspeshuar dhe lider i urtë dhe përplot devotshmëri ndaj përgjegjësisë me të cilën ngarkohet.
Politika shqiptare në Maqedoni, di të përfshihet nga madhështia, duke eklipsuar mundësitë, realitetin dhe kontekstin politik. Kjo vlen për opozitën e bashkuar të cilët u joshën nga kapaciteti nacional.
Në zgjedhjet e kaluara, ishte mjaftë e pakapshme për shqiptarët normal që të proklamohej votimi “për Kryeministrin shqiptar”. Tashmë, partitë opozitare, të gjitha së bashku, po provojnë “fatin” të peshohen me kandidatin e NDI-së për president.
Pas këtij vizioni për kryeministrin e parë shqiptar, gjendej optimizmi i atyre që besuan në lirinë, besuan në barazinë, besuan në mundësinë e shqiptarëve, aty, ishte lideri i shqiptarëve në Maqedoninë e Veriut, Ali Ahmeti.
Fitorja e madhe e BDI-së në zgjedhjet e kaluara, e siguroi marrëveshjen e koalicionit me LSDM për 100 ditët e Kryeministrit shqiptar. Kjo arritje, nxiti instinktet politike të kalimtarëve politikë, madje edhe të atyre të cilët shqipen nuk e kanë gjuhë të shpirtit, as gjuhë të marrëveshjes.
Në këtë renditje aktuale të forcave politike në Shkup, kur shqiptarët arritën kulmin e pozitave shtetërore me meritë, bëhen “bashkime”, me parime e pa parime, vetëm e vetëm të dobësohet BDI-ja apo partia e lirisë, gjegjësisht partia e unitetit nacional.
Politikanët e rinj shqiptarë në Maqedoninë e Veriut, të edukuar me dijet më të avancuara, të gardës së parë të qeveritarëve të BDI-së, kanë emra të përveçëm, përvojë, lidership e devotshmëri institucionaliste, për të drejtuar pozitat më të ndjeshme të një shteti, në rrafshin ndërkombëtar e shtetëror.
Bujar Osmani ka të gjitha atributet që kandidatura shqiptare për president, të balansojë realitetin me dëshirat e kalimtarëve politik, të fitojë racionalizmi nacional përballë modës, kandidatëve sezonal dhe humbësve serik.
Përkrahja e BDI-së, për kandidaturën e Bujar Osmanit do të jetë dëshmi e seriozitetit dhe pjekurisë politike. Kjo pjekuri tejkalon situatën kur çdo i dyti shqiptarë në Maqedoninë e Veriut është i bindur në prapavijë se është kandidat “tepër serioz” dhe meriton të jetë lider madje edhe “president”, paçka, nuk disponon minimumin e vlerave për kandidat, sikur kandidatura e kundër kandidatit shqiptar nga opozita, kandidat për president në Maqedoninë e Veriut.
Bujar Osmani, ishte dhe mbetet personaliteti më i kompletuar për skenën politike shqiptare për President, i gatshëm të ballafaqohet me sfidat që sjell politika kundër shqiptare, madje, edhe politika malicioze e opozitës shqiptare që nuk ia di hallin vetes.
Urime Dr. Bujar, kandidatura. Shqiptarët kanë kë të zgjedhin, kanë arsye edhe pse të zgjedhin!
Shqiptarët kanë kë të zgjedhin, kanë arsye edhe pse të zgjedhin dr. Bujar Osmanin për President!
