Greqia është prekur rëndë nga përmbytjet, të cilat i kanë marrë jetën katër personave, ndërsa pamjet mbeten të rënda.
Viktima më e fundit e gjetur është një 49-vjeçar, i cili ishte raportuar i humbur. Gjendja vijon të mbetet e vështirë dhe shumë zona janë ende nën pushtetin e ujit.
Shtëpitë në fshatin Horta në jug të Pilios janë nën pushtetin e ujit dhe me pjesë të rrëzuara. Reshjet e shiut të furishme dhe erërat e forta rritën në një kohë shumë të shkurtër nivelin e ujit.
Autoritetet kanë shpallur gjendje emergjente në prefekturën e Magnezisë, ishujt Sporades, në Karditsa, Trikala si dhe në disa bashki në Larisa e përreth saj. Pamjet janë tronditëse jo vetëm nga Volosi dhe Piliosi turistik, por edhe nga shumë fshatra në bregdet ku ujërat e rrëmbyera përpijnë makina dhe i hedhin në det.
Stuhitë e forta të shiut kanë shkaktuar rrëshqitje dheu dhe rrugët dytësore janë bllokuar ose shembur. Për disa orë është bllokuar edhe aksi kryesor që lidh Athinën me Selanikun pranë Lamias.
Fenomene ekstreme janë regjistruar edhe në zona të prefekturës së Ftiotidës, Peloponezit , Evias dhe Halkidhikisë.
Top Channel
