Deputeti i Lidhjes Demokratike të Kosovës, Avdullah Hoti, ka thënë se vendimi i Ministrisë së Arsimit që t’i subvencionojë prindërit për blerjen e teksteve shkollore për fëmijët e tyre do t’i kushtojë buxhetit të shtetit miliona euro më shumë.
Sipas tij, kjo është neglizhencë e paaftësi e qeverisë aktuale.
Hoti tutje ka thënë se shtëpitë botuese do të marrin nga libraritë, apo shitësit me pakicë, shumën e njëjtë të buxhetit sikurse që ofertuan në tenderin e qeverisë, e ndoshta edhe më shumë.
“Por, librat do t’i kushtojnë buxhetit të shtetit miliona euro më shtrenjtë pasi tani duhet paguar edhe marzhën e shitësve me pakicë të librave. Për keqardhje ku ka degraduar qeverisja e vendit. Imagjinoni si do kishin reaguar këta mashtrues sikur kjo të ndodhte në qeveritë paraprake”, ka shkruar ish-kryeministri në Facebook.
Ai ka shtuar se është viti i dytë me radhë që mësimi nuk fillon me rregull në Kosovë.
“Vitin e kaluar qeveria ishte në luftë me sindikatat dhe u humbën shumë javë mësim. Këtë vit problemi me librat do të pamundësoj nisjen e rregullt të mësimit”, ka përfunduar Hoti. /Telegrafi/