Pas brazilianit Natan, i cili zbarkon te Napoli për të zëvendësuar koreanin Kim në qendër të mbrojtjes, kampionët e Italisë kanë siguruar edhe një përforcim në mesfushë.
Presidenti De Laurentiis ka arritur marrëveshjen me francezët e Reims në lidhje me shërbimet e Jens Cajuste.
23-vjeçari me baba amerikan dhe nënë suedeze (15 ndeshje me kombëtaren vikinge), luan si mesfushor qendror dhe si “shkatërrues”.
Por falë forcës fizike dhe teknikës së mirë që zotëron, ai mund të ndihmojë jo pak shokët e skuadrës edhe në fazën ofensive.
Napoli do të paguajë rreth 12 mln euro për kartonin e tij. Cajuste do të zbarkojë në Napoli gjatë ditës së sotme për të kryer testet mjekësore.
Një përforcim që i shton muskujt dhe potencën skuadrës së Rudi Garcias, teksa do të zëvendësojë edhe kamerunasin Anguissa.
28-vjeçari është i dëmtuar, ndërkohë që gjatë muajit janar do të grumbullohet me Kombëtaren e tij në Kupën e Kombeve të Afrikës.
Gjatë një viti e gjysmë që u aktivizua në Ligue 1 me Reimsin, Cajuste shënoi 5 gola dhe dhuroi një asist në 39 ndeshje.
/BotaSot/
