Liderët e Bashkimit Evropian pritet të dënojnë incidentet e dhunshme të ndodhura në veri të Kosovës dhe të bëjnë thirrje për ç’tensionimin e situatës duke u bazuar në rekomandimet dhe sugjerimet e BE-së.
“Palët duhet të krijojnë kushte për zgjedhje të parakohshme në të katër komunat në veri të Kosovës. Dështimi për të de-përshkallëzuar tensionet do të ketë pasoja negative”, thuhet në draftin e konkluzioneve që liderët do të miratojnë në fund të samitit që do mbahet më 29 dhe 30 qershor.
Presidentët dhe kryeministrat e 27 shteteve të Bashkimit Evropian pritet të apelojnë për vijimin e dialogut dhe zabtimin e të gjitha elementeve të marrëveshjes për rrugën drejt normalizimit të raporteve mes Kosovës dhe Serbisë. Sipas draftit të përfundimeve, këtu përfshihet edhe themelimi i Ascociacionit të komunave me shumicë serbe në Kosovë.
Ukraina
Gjatë këtij samiti dy-ditor në Bruksel, liderët e BE-së do të diskutojnë edhe mbi luftën në Ukrainë dhe mbështetjen e vazhdueshme të BE-së për Ukrainën, si dhe për ekonominë, sigurinë, mbrojtjen, migrimin dhe marrëdhëniet me jashtë.
Këshilli Evropian do të trajtojë zhvillimet e fundit në luftën e agresionit të Rusisë kundër Ukrainës dhe mbështetjen e vazhdueshme të BE-së për Ukrainën, duke përfshirë mbështetjen financiare dhe ushtarake.
Që nga fillimi i luftës, BE-ja dhe vendet e saj anëtare kanë vënë në dispozicion rreth 72 miliardë euro për Ukrainën dhe popullin e saj dhe kanë miratuar një sërë masash kufizuese të paprecedentë kundër Rusisë.
Ekonomia
Udhëheqësit e BE-së do të ndjekin përfundimet e kaluara mbi politikën industriale të BE-së, tregun e vetëm dhe konkurrencën dhe produktivitetin afatgjatë të Evropës. Në takimin e tyre në mars 2023, liderët e BE-së diskutuan se si të ndërtojnë një ekonomi të fortë dhe të qëndrueshme që do të sigurojë prosperitet afatgjatë.
Siguria
Në këtë samit do të diskutohet edhe mbi sigurinë dhe rritjen e kapacitetit të saj mbrojtës, ndërkohë që pranon marrëdhëniet transatlantike dhe bashkëpunimi BE-NATO është kyç për sigurinë e përgjithshme.
“Në këtë drejtim, liderët e BE-së do të bëjnë një bilanc të progresit të bërë në drejtim të zbatimit të konkluzioneve të kaluara, duke përfshirë Deklaratën e Versajës, në të cilën liderët përshkruan masat për të forcuar aftësitë mbrojtëse të BE-së dhe Busullën Strategjike, e cila përcakton një sërë veprimesh koherente për të forcuar interesat e BE-së në mbrojtjen e qytetarëve evropianë“, thuhet në njoftimin e Këshillit Evropian.
Udhëheqësit e BE-së pritet të japin udhëzime të mëtejshme për sigurinë dhe kapacitetin mbrojtës të BE-së, veçanërisht në aspektin e prokurimit, investimeve dhe prodhimit.
Përpara samitit të ardhshëm të NATO-s në Vilnius më 11-12 korrik, udhëheqësit do të diskutojnë gjithashtu bashkëpunimin mes BE-së dhe NATO-s. Ky është samiti i radhës përkon me 20-vjetorin e samitit të Selanikut kur në vitin 2003 u konfirmua se dyert e Bashkimit Evropian janë të hapura për shtetet e Ballkanit Perëndimor.
Samiti i ardhshëm BE-CELAC në Bruksel do të mbahet në korrik, i cili do të mbledhë së bashku e liderët e BE-së dhe liderët nga blloku rajonal i Amerikës Latine dhe shteteve të Karaibeve.
