Ushqimet tipike shqiptare kanë “pushtuar” botën dhe kjo falë shqiptarëve, të cilët kanë ndërtuar jetën e tyre në shtete të tjera.
Filip Kajtazi, sipërmarrës, tregoi në një intervistë për emisionin GoodMorning Albanians në Euronews Albania se byreku më i preferuar është ai me mish, por shtoi se klientët amerikanë preferojnë edhe flinë që iu duket shumë e veçantë.
Ai tregoi se i kanë ardhur shqiptarë nga të gjitha vendet e botës vetëm për të ngrënë byrekun tradicional.
“Ai që preferoj unë më shumë është byreku me spinaq. Kur kemi ardhur në fillim, s’kemi pasur mundësi ekonomike, mishi ishte i shtrenjtë dhe nëna na bënte byrek me spinaq. Amerikanët e pëlqejnë shumë edhe flinë, që e shoqërojnë me kos. Vijnë shqiptarë nga Zvicra, Austria, Australia që të hanë byrekun tradicional dhe thonë se është njësoj sikur po hanë byrekun në Kosovë dhe Shqipëri”, tregoi sipërmarrësi.