Kryeministri i Kosovës, Albin Kurti, deklaroi se demokracia nuk mund të suspendohet ose të jetë peng. Sipas tij, kryetarët shqiptarë të komunave në veri të Kosovës edhe përkundër jehonës së dobët në zgjedhje për shkak të bojkotit të serbëve ende janë të vetmit që kanë legjitimitet që të jenë në objektet e komunave dhe në shërbim të qytetarëve dhe kanë mbështetje të plotë nga pushteti në Prishtinë.
“Nuk do ia dorëzojmë republikën tonë demokrate këtij grupi fashist. Nëse dëshirojnë protesta të qeta, me kërkesë për zgjedhje të parakohshme, kanë kryeministrin i cili gjithë jetën e tij ka qenë aktivist politik dhe është më shumë se i gatshëm që t’i dëgjojë dhe ndoshta do të pajtohet me ta. . . në Kosovë kemi pluralizëm politik, me disa parti politike. Por, në komunitetin serb Beogradi nuk lejon ndonjë parti politike përveç asaj që e kontrollojnë. D.m.th. nuk ka pluralizëm politik. Nuk besoj se ka demokraci pa pluralizëm politik, pa të drejta të njerëzve. Kjo parti i nxori të gjithë partitë tjera nga gara dhe në fund i bojkotoi zgjedhjet”, tha Albin Kurti, kryeministër i Kosovës.