Ministri i Mbrojtjes së Kosovës, Armend Mehaj, ka zhvilluar këtë të shtunë një takim me Rifat Jasharin, vëllanë e komandantit legjendar, Adem Jasharit.
Përmes një reagimi në rrjete sociale, ministri i Mbrojtjes së Kosovës nënvizon se në rrugën e zhvillimit të Ushtrisë së Kosovës, nuk kishin si të mungonin këshillat e bacës Rifat.
Mehaj shton se zhvillimi i Forcave të Armatosura të Kosovës do të bëhet gjithmonë duke kujtuar rrugën, sakrificën dhe mundin e familjes Jashari dhe të gjithë dëshmorëve të lirisë.
“Ai është heroi i gjallë mes nesh, i cili vazhdimisht përkujdeset që me mesazhet e tij të unifikoj të gjithë. Në rrugën që kemi përpara, vetëm bashkë mund të ecim. Baca Rifat i ka dhënë shumë kombit tonë dhe asnjëherë nuk ka marrë asgjë, ai është trashëgimia më e rëndësishme e qëndresës tonë heroike”, shkroi Mehaj.
