Marshimi i kompanisë Jeep drejt elektrifikimit të plotë ka nisur të shpejtojë. Avenger i vogël elektrik sivjet pushton tregun, e do të ndiqet nga Wagoneer S dhe Recon, që pritet të vijnë më vonë gjatë vitit.
Gjithsesi, tani shefi i kompanisë, Christian Meunier, ka konfirmuar se gjenerata e ardhshme Wrangler – ikonës së kompanisë për vetura ‘off-road’ (për terrene jo të zakonshme) – do të jetë jo vetëm tërësisht elektrik, por edhe më e mirë se modeli paraprak në rrugët e përditshme.
Jeepi ka paralajmëruar modelin tërësisht elektrik edhe në të kaluarën, por është hera e parë që kompania ka dhënë detaje publikisht. Duke folur për “Auto-Express”, Meunier ka shpjeguar se modeli i ri do të ketë pesë veçori kyçe: tërheqje, ecje në ujë, manovrim, lëvizshmëri e rrotave dhe distancë të theksuar nga sipërfaqja (lartësi).
Meunier ka thënë se synojnë që veturën e re ta çojnë në nivel tjetër të ngasjes.
Teksa brendi i madh amerikan po lëviz drejt elektrifikimit të plotë, Meunier ka siguruar se adhuruesit e Jeepit do të marrin bateri të fuqishme e cila do të jetë efikase edhe për terrenet jo të zakonshme.
“Gjëja madhështore për elektrifikimin është se e bën Jeepin edhe më të aftë. I jep më shumë fuqi; e bën më të butë dhe më të saktë. Pastaj arkitektura përreth tij, sistemi i frenimit, akset që do t’i përdorim, mund të shfrytëzohen si të dojë shoferi”, ka thënë ai.
Wrangleri i ri pritet të përdorë platformën e kompanisë amë, Stellantis, siç tashmë dihet te Jeep Recon.
Për shkak se Wrangleri i saposhpalosur në New York Times dhe Wagoneer S e Recon të konfirmuar si modele tërësisht elektrike, nuk pritet që Wrangleri i plotë tërësisht elektrik të dalë para vitit 2027.