Ministri i Punëve të Jashtme, Bujar Osmani, sot dhe nesër do të qëndrojë për vizitë zyrtare në Bosnjë dhe Hercegovinë në kuadër të aktiviteteve të tij si kryesues me OSBE-në.
Në BeH, Osmani do të zhvillojë takime me kreun e shtetit, përfaqësues të Kuvendit, përfaqësues të organizatave të shoqërisë civile, si dhe me partnerë dhe bashkëpunëtorë të tjerë të OSBE-së, kumtoi MPJ.
Gjatë vizitës dhe bisedimeve me zyrtarët e B&H, Osmani do t’i referohet drejtimit në të cilin do të lëvizë bashkëpunimi i mëtutjeshëm ndërmjet OSBE-së dhe B&H, si dhe mbështetjen e fushave prioritare për B&H nga kryesimi i Maqedonisë së Veriut me OSBE-në – lufta e intensifikuar kundër korrupsionit, pajtimi dhe forcimi i kohezionit social.
Misioni i OSBE-së në Bosnje dhe Hercegovinë është një nga misionet më të mëdha në terren të Organizatës për Siguri dhe Bashkëpunim në Evropë. Me selinë e tij në Sarajevë dhe 8 zyra në terren, Misioni i OSBE-së në B&H kontribuon në ndërtimin e kapaciteteve të institucioneve dhe ndërtimin e drejtpërdrejtë të besimit midis qytetarëve.
