Mijëra serbë janë ngritur në protestë kundër dhunës me armë në kryeqytetin Beograd dhe një qytet tjetër pas dy sulmeve me armë javën e kaluar që lanë të vdekur 17 persona, duke përfshirë tetë fëmijë në një shkollë fillore.
Protestuesit kërkuan dorëheqjen e zyrtarëve të lartë të qeverisë dhe duan që, gazetat dhe stacionet televizive që ata thonë se promovojnë dhunën, të mbyllen. Protestuesit kërkuan dorëheqjen e ministrit të brendshëm dhe kreut të agjencisë së inteligjencës serbe.
Turmat marshuan nëpër qendër të qytetit me pankarta, ku shkruhej “Serbia kundër dhunës”, “Duam shkolla, rrugë, fshatra dhe qytete të sigurta për të gjithë fëmijët”, raporton BBC.
I menjëhershëm ka qenë reagimi i Presidentit Aleksandër Vuçiq i cili dënoi protestat dhe akuzoi opozitën se ka kapitalizuar një tragjedi kombëtare për të promovuar interesat e veta. Ai tha se ishte gati të testonte popullaritetin e partisë së tij në një votim të menjëhershëm.
“Unë do të vazhdoj të punoj dhe nuk do të tërhiqem kurrë para rrugës dhe turmës… Nëse do të jetë një riorganizim i qeverisë apo zgjedhje, do të shohim”, tha ai.
Zgjedhjet e ardhshme parlamentare do të mbahen në vitin 2026.
