Njëzet e katër vjet pas luftës, liderët institucionalë dhe ish- guerilët e ish-Ushtrisë Çlirimtare të Kosovës e kujtojnë Betejën e Koshares, si njërën nga luftërat më të ashpra dhe më të heroike që ka zhvilluar UÇK kundrejt forcave të motorizuara serbe në kufirin Kosovë-Shqipëri.
Për këtë ditë në kujtim të betejës më të ashpër të luftimeve ka shkruar edhe njëri nga protagonistët e saj.
Veterani dhe invalidi i luftës së Ushtrisë Çlirimtare të Kosovës (UÇK), Frashër Oseku thotë se edhe këtë 24 vjetor të thyerjes së kufirit në Koshare, si çdo vit e parandien afrimin e kësaj date, si në shpirt e në trup, në indet “ku kam ende cifla granatash, e në eshtrat e cakërruara”.
“Sot përkulem me nderim para kujtimit të 112 shokëve e shoqeve që ranë të betuar për të bashkuar Shqipërinë. Ata patën vdekjen më të mirë në tërë fisin shqiptar. I varrosëm lart në maje malesh, prej ku mund të sodisin gjithë mëmëdheun. Gjer te varri i bartëm mbi supet tona, mbështjellur në krahë të dhembsur të shkabës dykrenare. Bij e bija më të mirë ajo s’kish varrosur kurrë”, ka shkruar Oseku.
Edhe pse ende me plagë në trup nga ajo betejë, Oseku thotë se ndihet i padenjë kur kujton sakrificën e të rënëve.
“Dyfish i padenjë, kur shikoj se si disa sot fshehin pas derës idealin, e flamurin e tyre e tonin. Por më mban një besim i patundur, se flijimi i tyre nuk qe i kotë. E ndiej në shpirt, atë thirrjen egërshane të amanetit të tyre. Ndonëse shumëkush do të donte ndryshe, me vitet kjo thirrje sa vjen e forcohet. E ndiej në trup, në indet ku kam plagët, e në eshtrat e mia të cakërruara. E ndiej se po afrohet – bashkimi i Shqipërisë”, ka shkruar ai.
Oseku uron ta shoh sa është ende gjallë këtë.
“Se dua ta shpie edhe një herë atje lart, këtë shpirt e këtë trup të thyer, atje në Koshare, e te Rrasa e Zogut. E të ulem në bar te ta, e t’u pëshpëris te kokat: shoku im, shoqja ime, tash njëmend u krye. Deri atë ditë, lavdi emrave të tyre! Lavdi emrit UÇK!”
Frashër Oseku është veteran i Ushtrisë Çlirimtare të Kosovës, i plagosur rëndë në betejën e Koshares. Ai ishte edhe luftëtar në Ushtrinë Çlirimtare Kombëtare, e cila bëri luftë për të drejtat e shqiptarëve në Maqedoni.
