Presidenti Stevo Pendarovski sot pranoi letrat kredenciale të ambasadores së sapoemëruar të Republikës Federale të Gjermanisë në Republikën e Maqedonisë së Veriut, Petra Drexler, informon bild.mk.
Duke i uruar mirëseardhjen ambasadores Drexler, presidenti Pendarovski vlerësoi se të dyja vendet i lidh një miqësi tradicionale dhe e sinqertë, e cila bazohet në bashkëpunim të larmishëm, respekt të ndërsjellë dhe qasje të hapur, ndërsa përcaktimi i këtillë, siç tha presidenti, paraqet një tjetër urë në ndërtimin e marrëdhënieve më të fuqishme miqësore mes të dyja vendeve.
“Si rezultat i përpjekjeve të përbashkëta, vendi ynë sot sheh në Republikën Federale të Gjermanisë një mik të madh dhe aleat të sinqertë në procesin e realizimit të prioriteteve tona strategjike. Një nga ato prioritete strategjike, anëtarësimi i plotë në NATO, tashmë është arritur dhe dy vendet tona janë vende aleate dhe kontribuojnë në realizimin e misionit kyç të NATO-s për garantimin e sigurisë së zonës euroatlantike në dritën e rrethanave të vështira gjeopolitike”. “, tha presidenti Pendarovski, duke vlerësuar se për ne është veçanërisht e rëndësishme që Republika Federale e Gjermanisë demonstron gatishmëri të qartë për të mbështetur Republikën e Maqedonisë së Veriut në rrugën e anëtarësimit të plotë në Bashkimin Evropian.
“Kam pasur kënaqësinë të mirëpres presidentin federal Frank Walter-Steinmeier në Shkup dhe ta prezantoj personalisht në vendin tim dhe ta siguroj se po investojmë të gjitha kapacitetet që kemi në dispozicion për përmbushjen e kritereve për anëtarësim në Bashkimin Evropian. Në të njëjtën kohë presim të njëjtin përkushtim nga Unioni për integrimin e Maqedonisë së Veriut dhe shteteve të rajonit, që është kusht kyç për përmbushjen e plotë të idesë së projektit evropian”, tha presidenti Pendarovski.
Në ceremoninë e dorëzimit të letrave kredenciale, ambasadorja Drexler vlerësoi se marrëdhënia jonë dypalëshe është e shkëlqyer dhe shtrihet përtej bashkëpunimit në nivel qeverish dhe përfshin angazhimin e fondacioneve politike dhe organizatave të ndërmjetësuesve kulturorë apo të Dhomës së madhe dypalëshe të Tregtisë që është shprehje e pranisë së gjerë të ekonomisë gjermane në Maqedoninë e Veriut dhe pasqyron pozicionin e Gjermanisë si partneri më i rëndësishëm tregtar.
“Vizitat e Presidentit Federal, Kancelarit Federal dhe Ministrit të Punëve të Jashtme në muajt e fundit janë shenja të qarta se ne jemi në anën e vendit tuaj. Qeveria federale e Gjermanisë do të vazhdojë të shoqërojë procesin e anëtarësimit në BE si një partner i besueshëm. Dua t’ju siguroj se gjatë mandatit tim do të investoj të gjithë energjinë time për këtë detyrë. Jemi të vetëdijshëm për kompromiset që u kërkuan kësaj radhe dhe që janë të dhimbshme për shumë njerëz në Maqedoninë e Veriut dhe që janë ende të nevojshme për ndryshimin e nevojshëm kushtetues. Për konsistencën, me të cilën vendi juaj ecën në rrugën e pranimit në BE, ju shprehim ju zoti President, mirënjohjen dhe respektin tonë të thellë”, tha ambasadorja Drexler.
Presidenti Pendarovski i uroi ambasadores Drexler kryerje të suksesshme të detyrës. / bild.mk