Zëvendëskryeministri i parë, Artan Grubi përmes një postimi në faqen e tij në Facebook ka përshendetur progresin e arritur në dialogun mes Kosovës dhe Serbisë në Ohër.
Ai ka potencuar se ashtu siç kishin premtuar kanë qëndruar pranë Kosovës gjatë këtij procesi krucial për shtetësinë e saj, duke potencuar se kryetari i BDI-së, Ali Ahmeti ka qëndruar që në orët e para të mëngjesit në mbështetje të Kryeministrit Kurti dhe marrëveshjes historike mes palëve.
”Përshëndes progresin e arritur në dialogun mes Kosovës dhe Serbisë sot në Ohër, përafrimin e qëndrimeve mes palëve me dakordësi mbi marrëveshjen si asnjëherë më parë me qëllim të zbatimit të normalizimit të marrëdhënieve mes tyre përmes njohjes së ndërsjelltë.Sot kryetari Ali Ahmeti ka qëndruar në Ohër që nga orët e para të mëngjesit, duke dëshmuar se i qëndrojmë gjithmonë në mbështetje Kosovës dhe rrumbullakësimit të plotë të shtetësisë së saj. Mirënjohje për ndërmjetësimin e drejtë dhe krucial të përfaqësuesve të Bashkimit Europian dhe Shteteve të Bashkuara të Amerikës për stabilitetin dhe ardhmërinë europiane të rajonit” – ka shkruar Grubi.
