Telashe për një tjetër kryebashkiak të PS. Kryetari i Bashkisë së Krujës Artur Bushi është thirrur sot nga SPAK, ku ka qëndruar për rreth 90 minuta.
Bushi ka mbërritur në Prokurorinë e Posaçme i thirrur nga SPAK për t’u pyetur për një ndërtim pa leje. Ai është marrë në pyetje nga hetuesit e BKH-së.
“Artur Bushi ka refuzuar të flasë për motive e thirrjes së tij nga Prokuroria e Posaçme. Por mësohet se ndaj ti ka dy kallëzime të regjistruara. Ditën e sotme është pyetur për një ndërtim pa leje të ndërtuar në qytetin e Krujës nga një subjekt. Bëhet fjalë për subjektin me iniciale M.H., i cili ka ndërtuar një objekt pa marrë leje nga autoritetet dhe më pas IKMT i ka vendosur një gjobë, ndërsa subjekti ka denoncuar më pas IKMT dhe kryetarin e Bashkisë Artur Bushi për veprën penale të shpërdorimit të detyrës. Për këtë çështje Bushi ka dhënë shpjegime. SPAK po heton dhe për një procedim penal për akuzat e shkeljes së barazisë në tendera, por nuk dihet nëse për këtë procedim Bushi do të merret në pyetje”, raportoi gazetarja Lala.
Artur Bushi është një emër i përfolur dhe i akuzuar shpesh nga opozita për të kaluarën e tij.
Vetëm një ditë më parë u arrestua me urdhër të SPAK kryetari i bashkisë së Bulqizës Lefter Alla si dhe disa zyrtarë të tjerë të kësaj bashkie, përfshirë nënkryetaren për abuzim me tenderin e rrjetit të ujësjellësit.