Spezia ka treguar edhe njëherë se është në gjendje të befasojë edhe skuadrat më të mëdha italiane, këtë herë duke mposhtur Interin në stadiumin “Alberto Piço” me rezultatin e ngushtë 2:1.
Djemtë e Simone Inzaghit shpërdoruan gjatë gjithë lojës mundësi “të arta”, duke filluar nga minuta e 13-të, kur Lautaro Martinez gabon nga pika e bardhë e penalltisë, duke mos gjetur dot avantazhin.
Golat e sfidës erdhën të gjitha në pjesën e dytë, ku të parët që gjetën epërsinë ishin vendasit e Spezia, me Daniel Maldini, i cili gjeti rrugën e rrjetës në minutën e 55-të. Kundërpërgjigja “zikaltër” erdhi në minutën e 83-të, me penalltinë e dytë për Interin, por këtë herë topin e gjuan Romelu Lukaku, i cili nuk gabon.
Mirëpo, nuk mbaron me kaq, pasi vetëm 7 minuta më pas, në të 87-ën, pas një tjetër penalltie të akorduar kësaj radhe për vendasit, M’Bala Nzola nuk gabon dhe “dënon” Interin.
Pas kësaj humbje pozitat e “zikaltërve” nuk lëvizin në kampionat, teksa ndodhen në vendin e 2-të, me 50 pikë, ndërsa në krahun tjetër Spezia arriti një fitore mjaft të vlefshme për “mbijetesën” në Serie A, ku ka grumbulluar deri tani 24 pikë dhe momentalisht ndodhet 6 pikë larg zonës së rënies nga kategoria.
