Lojtarët e Real Madridit pësuan disfatë (0:1) nga Barcelonës në ndeshjen e parë të gjysmëfinales së Kupës së Mbretit. Eden Hazard edhe këtë herë ishte në bankën e rezervistëve.
Belgu erdhi në Madrid në vitin 2019 me pritshmëri të mëdha dhe një çmim rekord. Ai ishte një nga futbollistët më të mirë në botë kur Chelsea e shiti për 115 milionë euro. Kështu, Hazard u bë lojtari më i shtrenjtë në historinë e Real Madridit, më i shtrenjtë se Cristiano Ronaldo dhe Gareth Bale.
Reali e solli atë si pasues të Ronaldos dhe supozohej se do të ishte lideri i skuadrës së re. Por karriera e Hazard mori tatëpjetën. Nga vera e vitit 2019 deri në fund të dimrit të 2022, ai luajti vetëm 73 ndeshje për Realin.
Lëndimet, përgatitja jo e mirë fizike, madje edhe mbipesha shënuan qëndrimin e Edenit në “klubin mbretëror”. Carlo Ancelotti nuk po e llogarit më belgun në planet e tij.
Këtë sezon ai u paraqit vetëm shtatë herë. Treguesi më i mirë se si dhe sa luan Hazard te Reali janë statistikat e tij në El Clasico. Më saktë, është inekzistent. E pabesueshme, por e vërtetë, gati 4 vjet pas ardhjes te Reali, ai nuk regjistroi asnjë minutë në ndeshjet kundër Barcelonës.
Mbrëmë, gjysmëfinalja e parë në Kupën e Mbretit, të cilën Reali e humbi 0:1 në shtëpi, ishte “El Clasico” e dhjetë që kur Hazard ishte te Reali dhe e kaloi atë, si nëntë të mëparshmet, në bankinë.