Mesi dhe Mbape të papërmbajtshëm. Yjet e PSG-së bënë gjithccka vetë në triumfin 0-3 që PSG-ja arriti në “Velodrom” ndaj Marsejës, teksa skuadra e Galtier tashmë është arratisur në krye me një diferencë +8 duke “vrarë” në një farë mënyre kampionatin.
Në minutën e 25-të ishte Mbape që pas asistit të Mesit zhbllokoi sfidën, teksa katër minuta më vonë, duket se francezi i ktheu reston argjentinasit, duke asistuar në golin e shënuar nga “Pleshti” në minutën e 29-të. Pjesa e parë përfundoi me rezultatin 0-2, teksa për të vulosur këtë triumf mendoi sërish dysha e yjeve Mesi-Mbape.
Ashtu si te goli i parë, Mesi nxori nga repertori i tij një asist spektakolar, me Mbape, që me një gjuajtje fluturimthi të kalibruar përshëndeti për herë të dytë rrjetën.
Në sfidën e radhës PSG-ja do të presë Nantën, teksa Marseja e vendit të dytë do të përballet me Ren.
