Në ditën e Pavarësisë së Kosovës, aktivisti i çështjes Shqiptare për shumë dekada, dhe humanisti Z. Jim (Xhim) Xhema, i shoqëruar nga Kryetari i Federatës Pan Shqiptare “Vatra” me seli në New York, Z. Elmi Berisha dhe aktivistë të tjerë, vizituan Shenjtëroren e Shën Nënë Terezës në Prishtinë. Ata u pritën nga Ipeshkvi i Kosovës, Mons. Dodë Gjergji me bashkëpunëtorë. Në këtë ditë të veçantë për Kosovën dhe gjithë shqiptarët, për të nderuar veprën dhe kontributin e tij të krijimit të Shtetit të Kosovës, pikëtakimi u bë para Shtatores së ish-Presidentit të Kosovës, Ibrahim Rugova. Ipeshkvi i uroi mysafirët e nderuar për 15-Vjetorin e shpalljes së Pavarësisë së Kosovës, ndërkaq bashkëbisedimi vazhdoi në lidhje me Katedralen kushtuar Shenjtëreshës sonë dhe rëndësinë e saj për besimtarët dhe shoqërinë shqiptare në përgjithësi.
Me këtë rast, Z. Xhema, pranë relikteve të Shën Nënë Terezës, i shoqëruar nga Ipeshkvi i Kosovës, ndezi një qiri për shpirtin e bashkëshortes së tij të ndjerë, Znj. Mrika Xhema. Pasi u luten së bashku për shpirtin e saj, në shenjë nderimi e falënderimi për vizitën, Ipeshkvi ynë, Mons. Doda, ju dhuroi nga një medalje të “Nënë Terezës”, Z. Xhim Xhema si dhe kryetarit të Federatës “Vatra”, z. Elmi Berisha.
