Presidenti i Serbisë, Aleksandar Vuçiq, ka njoftuar për takimin me emisarin e BE-së për dialogun Kosovë – Serbi, Miroslav Lajçak.
“Një bisedë e hapur dhe miqësore me Miroslav Lajçakun. Kur them e hapur, këtë e mendoj vërtetë. Më keni kuptuar të gjithë”, ka shkruar Vuçiq në Instagram.
Theksojmë se gjatë ditës së sotme, Lajçak ka qëndruar për vizitë në Kosovë. Ai ka zhvilluar një drekë pune me kryeministrin e Kosovës, Albin Kurti.
Kryeministri i Kosovës, Albin Kurti ka dhënë detaje pas takimit të zhvilluar me përfaqësuesin e BE-së për dialogun Kosovë-Serbi, Miroslav Lajçak.
Kurti ka thënë se Kosova e pranon propozimin e BE-së për normalizimin e marrëdhënieve me Serbinë.
“Shkëmbim i mirë me të dërguarin special të BE-së gjatë një drekë pune në Prishtinë. Ne do ta pranojmë propozimin e BE-së për normalizimin e marrëdhënieve ndërmjet Kosovës dhe Serbisë dhe do ta konsiderojmë atë një bazë të mirë për diskutime të mëtejshme dhe një platformë solide për të ecur përpara”, ka shkruar Kurti në Tëitter.
Në anën tjetër, Lajçak tha se arsyeja e vizitës në Kosovë dhe ajo e takimit me kryeministrin Albin Kurti është çështja e planit evropian.
I pyetur për çështjen e themelimit të Asociacionit të Komunave me Shumicë Serbe ai tha se tashmë është e ditur se gjithçka që është nënshkruar, duhet të zbatohet.