Në një takim me rininë e Kërçovës, Ilir Rushani, bartës i listës për këshilltar nga koalicioni AKI, theksoi rëndësinë e angazhimit dhe pjesëmarrjes aktive të të rinjve në vendimmarrje lokale dhe zhvillimin e komunës.
Rushani nënvizoi se Kërçova ka kaluar shumë sfida në të kaluarën, por e ardhmja e qytetit nuk mund të ndërtohet pa idetë dhe energjinë e rinisë.
“Besoj se të rinjtë nuk janë vetëm e ardhmja, por edhe e tashmja. Ata janë me vizion dhe është koha që të veprojnë. Rinia duhet të jetë jo vetëm spektatore, por aktore, drejtues dhe frymëzuese në zhvillimin e Kërçovës,” tha Rushani.
Ai shtoi se angazhimi i tij kryesor është të krijojë hapësira ku zëri i rinisë të dëgjohet dhe të mbështetet me projekte konkrete në këshillin lokal.
“Një nga detyrat më të rëndësishme është që rinia të jetë pjesë aktive e vendimmarrjes, duke sjellë ide dhe energji për zhvillimin e komunës sonë. Kërçova jonë duhet të udhëhiqet nga Fatmir Dehari dhe të udhëhiqet në gjuhën shqipe, sepse ajo është pjesë e identitetit tonë,” përfundoi Rushani.
