Pasi njoftoi se nuk do të rinovojë me Paris Saint-Germain përtej 30 qershorit 2024, kur i përfundon kontrata aktuale, Kylian Mbappe është rikthyer në kryefjalën e merkatos së verës, pasi PSG është i interesuar për ta shitur që tani, për të mos e humbur me parametër zero pas një viti.
Gjatë orëve të fundit, është zbuluar shuma që kërkon të arkëtojë skuadra pariziene nga shitja e kartonit të sulmuesit 24-vjeçar.
Sipas ESPN, PSG është gati të dëgjojë oferta duke filluar nga 150 milionë euro.
Kjo do të ishte shuma për të cilën PSG do të thoshte “po”, si e keqja më e vogël, duke pasur parasysh mundësinë që ai të largohet në qershor 2024 si lojtar i lirë.
Megjithatë, shuma e përmendur mund të jetë pak më e lartë në rast se Reali i Madridit është i interesuar ta blejë këtë verë Mbappénë, sepse marrëdhëniet mes bardhezinjve dhe parizienëve nuk janë të mira.
Sipas “Le Parisien”, dëshira e sulmuesit francez është t’i bashkohet Realit, duke përjashtuar opsionet e tjera.
/BotaSot/