Kryetari i Tetovës, Bilall Kasami, ka njoftuar se më 6 shtator në qytet do të zhvillohen Kampionati Shtetëror në Ngjitje Malore dhe një garë ndërkombëtare e çiklizmit. Ai tha se për herë të parë Komuna e Tetovës dhe Federata e Çiklizmit e Maqedonisë së Veriut po e sjellin këtë ngjarje sportive në qytet.
“Sot pata kënaqësinë të takohem me kryetarin e Federatës së Çiklizmit të Maqedonisë së Veriut, Emil Cvetanov, dhe kryetarin e Klubit të Çiklizmit “Phoenix Cycling Team”, Senad Idrizi. Biseduam për përgatitjet e Kampionatit Shtetëror në Ngjitje Malore dhe të garës ndërkombëtare të çiklizmit, të cilat do të mbahen më 6 shtator 2026 në Tetovë.
Për herë të parë, Komuna e Tetovës dhe Federata e Çiklizmit e Maqedonisë së Veriut po e sjellin këtë ngjarje të madhe sportive në qytetin tonë.
Tetova po bëhet qendër e ngjarjeve të rëndësishme, sepse ne nuk presim që mundësitë të vijnë vetë, por punojmë dhe i krijojmë ato.
Më 6 shtator, malet tona do të bëhen arenë gare, ndërsa Tetova do të dëshmojë se ka bukurinë, mikpritjen dhe fuqinë për të organizuar ngjarje sportive me përmasa ndërkombëtare”, deklaroi Kasami.
