Komisioni Evropian i bëri thirrje Rusisë që të lejojë dërgesat e drithërave nga Ukraina në tregjet globale nëpërmjet Detit të Zi.
“Ndryshimi i klimës është një kërcënim global, dhe një faktor që kontribuon në pasigurinë ushqimore. Siguria ushqimore është gjithashtu pre e agresionit të Rusisë në Ukrainë”, tha presidentja e Komisionit Evropian Ursula von der Leyen, ndërsa foli në sesionin e parë, ‘Një tokë ’, të samitit të G-20 në New Delhi.
“Ne i bëjmë thirrje Rusisë që të lejojë drithërat nga Ukraina të arrijë në tregjet globale nëpërmjet Detit të Zi. Ne po bëjmë çmos për të lehtësuar që drithërat të arrijnë në tregjet globale nëpërmjet rrugës tokësore”, tha ajo.
“Askush nuk duhet të jetë i uritur dhe udhëheqësit e G-20 kanë përgjegjësinë dhe mjetet për të mundësuar dërgimin e grurit atje ku nevojitet”, tha Von der Leyen.
Ajo tha se vetëm në pesë vitet e ardhshme, Komisioni Evropian do të investojë të paktën 4 miliardë euro (4.3 miliardë dollarë) në energjinë e rinovueshme dhe hidrogjen në ekonomitë në zhvillim përmes planit Global ‘Gateway’.
Gjithashtu ajo ftoi liderët e G-20 që t’i bashkohen thirrjes “për çmimin global të karbonit”.
Më herët, duke propozuar Misionin Satelitor G-20 për Mjedisin dhe Vëzhgimin e Klimës, Kryeministri indian Narendra Modi tha në seancën inauguruese të Samitit G-20 se “nevoja e kohës” është që të gjitha vendet duhet të punojnë së bashku në fushën e përzierjes së karburantit.
“Propozimi ynë është të marrim një iniciativë në nivel global për të marrë përzierjen e etanolit në benzinë deri në 20%… Në këtë kontekst, sot, ne po lançojmë Aleancën Globale të Biokarburanteve. India ju fton të gjithëve që t’i bashkoheni kësaj nisme”, tha ai.
Samiti i 18-të i liderëve të G-20 filloi të shtunën në New Delhi nën temën “Një tokë, një familje, një e ardhme”.
Top Channel
