Myftinia e Tetovës pati kënaqësinë të mirëpresë në një vizitë zyrtare anëtarin e Kryesisë së Qendrës Kulturore Islame në Frankfurt, z. Emin Havzija, i cili u prit nga Myftiu i Tetovës, dr. Selver Xhemaili i shoqëruar nga arkatari Texhep ef. Veseli.
Gjatë takimit u zhvillua një bisedë miqësore dhe vëllazërore, ku u diskutua për aktivitetet fetare, arsimore dhe kulturore që zhvillohen në vend dhe në diasporë, si dhe për rëndësinë e forcimit të bashkëpunimit ndërmjet institucioneve islame në shërbim të besimtarëve.
Myftiu dr. Selver Xhemaili e falënderoi z. Havzija për vizitën dhe vlerësoi kontributin e bashkatdhetarëve tanë në diasporë në ruajtjen e identitetit fetar, kombëtar dhe kulturor. Nga ana e tij, z. Emin Havzija shprehu mirënjohjen për mikpritjen e ngrohtë, duke theksuar gatishmërinë për thellimin e bashkëpunimit dhe realizimin e projekteve me interes të përbashkët.
Myftinia e Tetovës mbetet e përkushtuar në kultivimin e marrëdhënieve të mira me institucionet dhe komunitetet islame në diasporë, duke forcuar lidhjet e bashkëpunimit dhe unitetit në të mirë të umetit dhe shoqërisë.
