Kryetari i Bashkimit Demokratik për Integrim, Ali Ahmeti, ka përkujtuar sot ngjarjet tragjike të 9 korrikut 1997 në Gostivar, duke i cilësuar ato si një nga kapitujt më të dhimbshëm të historisë së afërt të shqiptarëve në Maqedoninë e Veriut.
Në mesazhin e tij, Ahmeti theksoi se atë ditë shqiptarët u përballën me dhunë brutale shtetërore, maltretime, arrestime, humbje jetësh dhe burgosje, vetëm pse kërkonin respektimin e identitetit, dinjitetit dhe të drejtave të tyre legjitime.
Sipas Ahmetit, një nga faktorët që parapriu krizën ishte edhe vendimi i padrejtë i Gjykatës Kushtetuese, e cila, në vend që të ishte garantuese e rendit kushtetues, e të drejtave themelore dhe e bashkëjetesës, u shndërrua në burim tensionesh me pasoja të rënda.
“Ngjarjet e 9 korrikut 1997 duhet të mbeten një mësim i përhershëm për të gjithë ne. Historia nuk duhet të përsëritet. Institucionet duhet të jenë garantuese të Kushtetutës, të barazisë, të drejtësisë dhe të paqes, e jo burim krizash dhe tensionesh ndëretnike”, theksoi Ahmeti.
Në fund të mesazhit, kreu i BDI-së shprehu nderimin për të gjithë ata që humbën jetën, u plagosën, u maltretuan, u burgosën dhe u sakrifikuan në mbrojtje të dinjitetit dhe të drejtave të shqiptarëve, duke vlerësuar se kujtesa për Gostivarin e vitit 1997 mbetet një obligim që padrejtësi të tilla të mos përsëriten kurrë më.
Ja postimi plotë:
Sot kujtojmë me dhimbje dhe respekt ngjarjet e rënda të 9 korrikut 1997 në Gostivar, një nga kapitujt më të dhimbshëm të historisë sonë të afërt, kur shqiptarët u përballën me dhunë brutale shtetërore, maltretime, arrestime, humbje jetësh dhe burgosje, vetëm pse kërkonin respektimin e identitetit, dinjitetit dhe të drejtave të tyre legjitime.
Gjenerator i asaj krize ishte edhe vendimmarrja e padrejtë e Gjykatës Kushtetuese, e cila, në vend që të ishte mbrojtëse e rendit kushtetues, e të drejtave dhe e bashkëjetesës, u shndërrua në burim tensionesh dhe të një krize me pasoja të rënda. Ajo që pasoi në rrugët e Gostivarit mbetet dëshmi e dhimbshme se çfarë ndodh kur institucionet humbin paanshmërinë, kur drejtësia politizohet dhe kur të drejtat e një populli trajtohen si kërcënim.
Ngjarjet e 9 korrikut 1997 duhet të mbeten mësim i përhershëm për të gjithë ne. Historia nuk guxon të përsëritet. Institucionet duhet të jenë garantuese të Kushtetutës, barazisë dhe paqes, e jo gjeneratore të krizave dhe tensioneve ndëretnike.
Sot nderojmë të gjithë ata që u vranë, vuajtën, u maltretuan, u burgosën dhe u sakrifikuan në mbrojtje të dinjitetit dhe të drejtave të shqiptarëve. Kujtesa për Gostivarin e vitit 1997 është njëkohësisht obligim që veprime të tilla të mos përsëriten kurrë më.
