Sekretari i përgjithshëm i Bashkimit Demokratik për Integrim (BDI), Arbër Ademi, ka reaguar lidhur me debatet rreth Ligjit për Gjuhët dhe procedurave në Gjykatën Kushtetuese.
Ademi theksoi se çdo çështje që lidhet me dispozitat ligjore duhet të trajtohet në mënyrë të rreptë në përputhje me Kushtetutën dhe parimet e shtetit të së drejtës. Sipas tij, respektimi i kornizës kushtetuese është thelbësor për funksionimin e institucioneve dhe për ruajtjen e stabilitetit juridik në vend.
Ai vlerësoi gjithashtu se transparenca në proceset kushtetuese është me rëndësi të veçantë, në mënyrë që qytetarët të kenë besim në vendimmarrjen institucionale dhe të shmangen keqinterpretimet në opinionin publik.
Në reagimin e tij, Ademi theksoi se të drejtat gjuhësore përbëjnë një segment të rëndësishëm të rendit juridik dhe të marrëveshjeve politike në vend, duke shtuar se çdo debat për këtë çështje duhet të zhvillohet me përgjegjësi institucionale dhe pa tensione politike.
BDI, përmes këtij qëndrimi, rithekson angazhimin e saj për mbrojtjen e barazisë gjuhësore dhe respektimin e të drejtave të garantuara të komuniteteve në vend.
Ja postimi plotë:
I vetmi që po manipulon në këtë rast është Darko Kostadinovski. Edhe në deklaratën e tij të fundit sonte ai pranoi se disa dispozita të Ligjit për Gjuhët qenkan “problematike” nga aspekti kushtetues. Kjo vetëm sa e vërteton edhe një herë planin dhe synimin e tij të qartë: abrogimin dhe shfuqizimin e dispozitave kyçe të Ligjit për Gjuhët.
Në vend që të merret me pyetjen se si referati i tyre prej 75 faqesh doli në opinion dhe u publikua në media, sonte duhej t’u përgjigjej qytetarëve: pse kërkon të shfuqizohen 18 dispozita të Ligjit për Gjuhët, kur vetë Kushtetuta e ka përcaktuar këtë si materie ligjore? Pse nuk heqin dorë nga një referat që synon masakrimin institucional të gjuhës shqipe dhe kthimin prapa të të drejtave të fituara me shumë mund e sakrificë?
Planin e Darkos e dimë. Atë plan e kemi në dorë. Dhe duhet ta ketë të qartë se nuk është e lehtë të zhbëhet ajo që është arritur me sakrificë dhe përkushtim. Larg duart nga gjuha shqipe.
