Lidhja Socialdemokrate e Maqedonisë (LSDM) ka dalë me akuza të reja lidhur me statusin e ish-kryeministrit Nikola Gruevski, duke pretenduar se ai tashmë posedon pasaporta hungareze dhe serbe. Sipas LSDM-së, informacionet e fundit që kanë arritur në parti tregojnë se Gruevski, i shpallur në arrati nga drejtësia, ka siguruar mbrojtje ndërkombëtare përmes këtyre shtetësive. Nga kjo parti vlerësojnë se një zhvillim i tillë nuk mund të ndodhë pa mbështetjen e drejtpërdrejtë politike nga kryeministri hungarez Viktor Orbán dhe presidenti serb Aleksandar Vuçiç, të cilët i cilësojnë si aleatë dhe mbrojtës të tij.
Në reagimin e tyre, LSDM akuzon drejtpërdrejt kryeministrin Hristijan Mickoski se po vepron me qëllim për të penguar kthimin e Gruevskit në vend. Sipas tyre, mosveprimi i qeverisë dhe refuzimi për të dërguar një kërkesë të re për ekstradim përbëjnë, siç thonë, “mbrojtje të hapur politike”.
“Ndërkohë që shtete të tjera, si Polonia, veprojnë me shpejtësi në raste të tilla, Mickoski i blen kohë Gruevskit”, theksohet në komunikatë. LSDM më tej akuzon se qeveria dhe partia në pushtet nuk kanë vullnet që ish-kryeministri të përballet me drejtësinë në Maqedoninë e Veriut. Sipas tyre, kjo situatë përfaqëson një rast tipik të ndërhyrjes politike për të mbrojtur një të dënuar. Në fund, LSDM kërkon transparencë dhe veprime konkrete nga institucionet për të siguruar kthimin e Gruevskit dhe vendosjen e drejtësisë.
