Kryetari i Qeverisë së Republikës së Maqedonisë së Veriut, Hristijan Mickoski, sot duke iu përgjigjur pyetjes gazetareske në lidhje me vendimin e Komisionit Rregullator për uljen e çmimeve të derivateve, se çfarë pas 20 prillit, a do të vazhdojë masa për TVSH-në e reduktuar dhe a janë të kënaqur në lidhje me çmimet e reduktuara, deklaroi:
„Lidhur me pjesën e dytë, këtu nuk ka hapësirë nëse jemi të kënaqur apo nuk jemi të kënaqur, ai është ligj dhe ajo është formulë. Dhe ne atë formulë e llogarisim kur mbyllen bursat, afërsisht si indikator e dimë se çfarë mund të presim në fillim të javës së ardhshme. Në këtë rast të hënën, kur më së shpeshti janë seancat e Komisionit Rregullator për Energjetikë, ashtu do të jetë edhe këtë javë.“
Ne këtë e paralajmëruam, ju kujtohet të shtunën, në konferencën për shtyp në Qeveri, se karburantet pa plumb 95 dhe 98 oktane do të ulen për 1,5 denarë për litër, ndërsa dizeli për 2,5 denarë. Dhe këtu nuk janë llogaritur ato zbritje që i jep OKTA, 2 denarë për karburantet pa plumb dhe 3 denarë për litër për dizelin.
Pres që, nga ajo që ndjek në tregjet e aksioneve, të paktën këto çmime do të mbeten dhe një rënie e mëtejshme është e mundur javën tjetër. Të paktën këtë mëngjes i ndjek, ato po lëvizin në një nivel që është rreth 90-91 dollarë për fuçi si për produktin amerikan ËTI ashtu edhe për produktin Brent.
Po i ndjek minutë pas minute dhe madje pres që të kemi një ulje javën tjetër, gjegjësisht këtë të hënë.
Sa i përket gjendjes së krizës, në mbledhjen e djeshme të qeverisë u mor vendim që ajo të vazhdohet edhe për një periudhë të caktuar. Do të kemi një mbledhje shtesë në të cilën do të marrim masë që ende ta mbajmë nivelin e tatimit mbi vlerën e shtuar në 10%, në vend se në 18%. Në varësi nga çmimet e bursës, ashtu do të jenë edhe akcizat, apo jo, aty është e rregulluar me ligj se sa duhet të jenë ato zbritje. Kështu që kjo është afërsisht situata e tanishme.
Lidhur me atë nëse do të vazhdojë masa prej 70 denarësh në OKTA, kryeministri Mickoski tha:
„Po, deri në fund të prillit. Dhe po negociojmë për karburantin dizel, pasi ai përbën afërsisht 75% të portofolit të përgjithshëm të konsumit, që të ketë të paktën edhe ndonjë zbritje shtesë. Do të shohim, mendoj se po bëjmë përpjekje që të nxjerrim edhe një denar më pak për litër.“
