Në kuadër të Samiti IV i Diasporës Shqiptare, në Tiranë u organizua Mbrëmja Gala, një nga aktivitetet më të rëndësishme të këtij samiti, e cila mblodhi personalitete të njohura nga Shqipëria, rajoni dhe diaspora shqiptare në mbarë botën.
Në këtë ngjarje të veçantë mori pjesë edhe lideri i Bashkimit Demokratik për Integrim, Ali Ahmeti, i cili vlerësoi lart rolin dhe kontributin e diasporës në forcimin e lidhjeve kombëtare dhe në zhvillimin ekonomik, kulturor dhe shoqëror të vendeve tona.
Ahmeti theksoi se diaspora shqiptare mbetet një ndër shtyllat më të rëndësishme të kombit, duke kontribuar jo vetëm financiarisht, por edhe me dije, përvojë dhe ndikim në arenën ndërkombëtare.
Ai nënvizoi se bashkëpunimi më i ngushtë ndërmjet institucioneve dhe diasporës është thelbësor për përballimin e sfidave të përbashkëta dhe për ndërtimin e një të ardhmeje më të qëndrueshme për shqiptarët kudo që ndodhen.
Gjatë fjalës së tij, ai gjithashtu vuri në dukje rëndësinë e ruajtjes së identitetit kombëtar, gjuhës dhe traditave, duke theksuar se këto vlera janë themeli i unitetit dhe i vazhdimësisë sonë si komb.
Mbrëmja Gala u zhvillua në një atmosferë festive dhe bashkuese, ku u promovuan vlerat e përbashkëta, kultura dhe arritjet e diasporës shqiptare. Pjesëmarrësit patën mundësinë të shkëmbejnë ide, të forcojnë bashkëpunimin dhe të krijojnë ura të reja lidhjeje ndërmjet shqiptarëve nga të gjitha trojet dhe diaspora.
Ky aktivitet shërbeu si një dëshmi e qartë e rëndësisë që ka diaspora në jetën kombëtare dhe si një platformë për të thelluar më tej bashkëpunimin dhe solidaritetin ndërshqiptar.
