Në një atmosferë të mbushur me emocione dhe krenari kombëtare, u zhvillua manifestimi përkujtimor i Kryengritjes së Malësisë, me pjesëmarrjen e nxënësve të Shkollës Shqipe, prindërve të tyre, stafit pedagogjik dhe përfaqësuesve të shoqatës “Jehona e Malësisë”.
Ky aktivitet u shndërrua në një dëshmi të gjallë të përkushtimit për ruajtjen dhe kultivimin e identitetit kombëtar, ku rolin kryesor e patën fëmijët. Me sinqeritetin dhe pastërtinë e tyre shpirtërore, ata dëshmuan se vlerat kombëtare nuk janë vetëm një trashëgimi e së kaluarës, por një ndjenjë e gjallë që zhvillohet dhe forcohet çdo ditë.
Të pranishmit u shprehën të prekur dhe të frymëzuar nga mënyra se si këta nxënës, ndonëse në moshë të re, bartin me dinjitet gjuhën, kulturën dhe historinë shqiptare. Ata u vlerësuan jo vetëm si nxënës, por si bartës të identitetit dhe zë i së ardhmes së komunitetit.
Kontribut i veçantë në këtë arritje i atribuohet prindërve dhe mësimdhënësve, të cilët me përkushtim të vazhdueshëm po edukojnë brezat e rinj me dashuri për atdheun dhe vlerat kombëtare.
Nga shoqata “Jehona e Malësisë” u shpreh mirënjohje e thellë për të gjithë pjesëmarrësit, duke theksuar se e ardhmja e komunitetit është në duar të sigurta – në duart e këtyre fëmijëve, të cilët jo vetëm e ruajnë identitetin kombëtar, por e lartësojnë atë çdo ditë.
Ja postimi plotë:
Dëshirojmë të shprehim mirënjohjen tonë më të thellë dhe respektin më të veçantë për të gjithë nxënësit e Shkollës Shqipe, prindërit e tyre, stafin pedagogjik, si dhe bordin e shoqatës “Jehona e Malësisë”, për pjesëmarrjen dhe kontributin e tyre në manifestimin përkujtimor të Kryengritjes së Malësisë.
Megjithatë, një falënderim i posaçëm dhe plot admirim u takon pikërisht këtyre fëmijëve të cilët, me pastërtinë e shpirtit dhe sinqeritetin e tyre, po dëshmojnë se vlerat kombëtare nuk janë vetëm trashëgimi, por janë një ndjenjë e gjallë që rritet dhe forcohet brenda tyre çdo ditë.
Është thellësisht prekëse dhe frymëzuese të shohësh se si ata, në një moshë kaq të re, bartin me dinjitet gjuhën, kulturën dhe historinë tonë, duke reflektuar një vetëdije që shpesh tejkalon pritshmëritë. Ata nuk janë vetëm nxënës – janë bartës të identitetit, janë zë i së ardhmes dhe dëshmi se fryma kombëtare jeton fuqishëm në brezat që po rriten.
Merita për këtë i takon padyshim edhe prindërve dhe mësimdhënësve, të cilët me përkushtim të jashtëzakonshëm po kultivojnë këtë ndjenjë të pastër dhe të qëndrueshme. Por mbi të gjitha, janë këta fëmijë që e japin kuptimin më të bukur dhe më të sinqertë të fjalës atdhedashuri.
Me plot bindje dhe krenari themi se e ardhmja e komunitetit tonë është në duar të sigurta – në duart e këtyre fëmijëve të mrekullueshëm, të cilët jo vetëm po e ruajnë identitetin tonë, por po e lartësojnë atë me dinjitet.
Ju falënderojmë nga zemra për këtë shembull të jashtëzakonshëm, që na mbush me shpresë, krenari dhe besim për të ardhmen.
Kryetar i shoqatës “Jehona e Malësisë “
Zef Berishaj
