Nikollë Camaj, nënkryetar i Parlamentit të Malit të Zi, ka përcjellë një mesazh me rastin e 6 Prillit – Ditës së Kryengritjes së Malësisë, duke e vlerësuar këtë ngjarje si një ndër momentet më të rëndësishme të historisë kombëtare shqiptare.
Në pamundësi për të marrë pjesë në aktivitetet e organizuara nga Shoqata Atdhetare “Kulla e Bajraktarit të Hotit” / Muzeu “Malësia”, si dhe nga institucionet lokale në Malësi dhe Bashkia Malësi e Madhe, Camaj shprehu mirënjohjen e tij për ftesën dhe për organizimin e kësaj ngjarjeje përkujtimore.
Ai theksoi se Kryengritja e Malësisë e vitit 1911 përbën një akt të rëndësishëm të përpjekjeve për liri dhe të drejta kombëtare, e cila kulmoi me ngritjen e flamurit kombëtar në Deçiq, duke forcuar ndërgjegjen kombëtare dhe duke i hapur rrugë proceseve që çuan drejt shpalljes së pavarësisë së Shqipërisë.
Camaj përgëzoi organizatorët e konferencës shkencore kushtuar kësaj ngjarjeje historike, si dhe përshëndeti referuesit dhe pjesëmarrësit, duke u uruar suksese në zhvillimin e këtij manifestimi me rëndësi të veçantë për Malësinë, për popullin shqiptar dhe për ruajtjen e kujtesës historike.
Në fund, ai shprehu nderimin dhe respektin e tij për këtë përvjetor të rëndësishëm.
Ja postimi plotë:
Sot, Shoqata Atdhetare Kulla e Bajraktarit të Hotit/Muzeu Malësia, feston 6 Prillin, Ditën e Kryengritjes së Malësisë, Ditën e ngritjes së parë të flamurit tonë kombëtar, që nga koha e Gjergj Kastriotit-Skenderbeut.
Në këtë aktivitet të kësaj ngjarje kaq të rëndësishme historike isha i ftuar, por për arsye se jam jashtë shtetit për disa ditë në vijim, nuk do të mund të jem i pranishëm, skur as edhe në atë që organizon komuna jonë, e që mbahet mu me 06 prill, si edhe Bashkia Malesia e Madhe.
Si njeri që kurrë se kalova pa shënuar këtë Ditë, që nga 80-vjetori i saj, pra nga viti 1991, përpos urimit dhe falënderimit, nuk mundem të mos shpreh ca fjalë për të, edhe me këtë rast.
Kryengritja e Malësisë e vitit 1911 përfaqëson një nga ngjarjet më domethënëse në historinë tonë kombëtare. Ajo u zhvillua si një përpjekje e organizuar e prijësve dhe banorëve të Malësisë për të kërkuar të drejta dhe liri, duke kulmuar me ngritjen e flamurit në Deçiq, respektivisht në Bratilë, ku edhe vendosëm monumentin për këtë ngjarje-simbol që forcoi ndërgjegjen kombëtare dhe u dha shtysë proceseve që çuan drejt pavarësisë së shtetit shqiptar.
Prandaj edhe shpreh falënderimin tim të sinqertë për ftesën dhe për organizimin e kësaj konference shkencore kushtuar Kryengritjes së Malësisë së vitit 1911 – këtij momenti të lavdishëm që mbetet themel i rrugëtimit drejt Pavarësisë Kombëtare.
Përpos organizatorit, përzemërsisht dua të përshëndes edhe referuesit dhe të gjithë pjesëmarrësit, duke ju uruar suksese në zhvillimin e këtij manifestimi me vlerë të madhe për Malësinë, për popullin shqiptar dhe për kujtesën tonë historike.
Nder dhe respekt për këtë përvjetor të rëndësishëm!
