Sot, Ali Ahmeti ishte në fshatin Bresalc të Gjilanit, ku shprehu ngushëllimet e tij për familjen Syla pas ndarjes nga jeta të Idriz Sylës.
Idrizi ishte vëllai i Shemsi Sylës, një figure e njohur e veprimtarisë ilegale atdhetare dhe e Ushtrisë Çlirimtare të Kosovës, i cili shërbeu si Zëvendëskomandant i Zonës së Karadakut gjatë luftës.
Familja Syla dha kontribut të madh për çlirimin e Kosovës; katër nga pesë djemtë e Idrizit shërbyen në UÇK, duke dëshmuar përkushtimin dhe sakrificën e tyre.
Kujtimi i tij të mbetet i përjetshëm, “I lehtë i qoftë dheu i Kosovës.”- tha Ahmeti.
Ja postimi plotë:
Sot isha për ngushëllime në fshatin Bresalc të Gjilanit, ku ndava dhimbjen me familjen Syla për humbjen e të ndjerit Idriz Syla.
Idrizi ishte vëllai i shokut tonë të veprimtarisë ilegale atdhetare dhe të luftës së armatosur çlirimtare, Shemsi Syla.
I ndjeri Idriz Syla ishte një atdhetar i madh dhe shtyllë e familjes. Në vitet e vështira para çlirimit të Kosovës, mbi supet e tij ra barra e familjes, pasi vëllai i tij, shoku dhe bashkëluftëtari ynë Shemsi Syla, ishte i burgosur politik, ndërsa gjatë luftës shërbeu si Zëvendëskomandant i Zonës së Karadakut të UÇK-së.
Shemsi Syla e ka vazhduar angazhimin e tij edhe pas luftës dhe sot shërben si Zëvendësministër i Mbrojtjes në Qeverinë e Kosovës.
Nga pesë djemtë e tij, katër Idrizi i pati ushtarë të Ushtrisë Çlirimtare të Kosovës, dëshmi e sakrificës dhe përkushtimit të kësaj familjeje për lirinë.
I lehtë i qoftë dheu i Kosovës.
