Këshilltari i Aleancës Kombëtare për Integrim (AKI) në Këshillin e Qytetit të Shkupit, Abdulselam Selami, ka reaguar pas seancës së sotme të Këshillit, në të cilën u votuan anëtarët e bordeve drejtuese të ndërmarrjeve publike.
Sipas Selamit, grupi i këshilltarëve të AKI-së nuk e ka mbështetur këtë pikë të rendit të ditës për shkak të, siç u shpreh ai, mungesës së përfaqësimit të drejtë dhe adekuat të shqiptarëve në këto borde.
Ai theksoi se nga koalicioni VLEN është përfshirë vetëm një numër simbolik i anëtarëve shqiptarë, çka sipas tij nuk pasqyron realitetin demografik të qytetit dhe as parimin e përfaqësimit të barabartë.
“Ne kërkojmë një Shkup të barabartë për të gjithë qytetarët dhe në këtë drejtim nuk do të bëjmë kompromis”, deklaroi Selami, duke bërë thirrje për mbështetjen e qytetarëve në realizimin e këtij qëllimi.
Reagimi i tij vjen në kohën kur çështja e përfaqësimit etnik në institucionet publike mbetet një nga temat më të diskutuara në skenën politike lokale.
