Me ftesë të Ambasadorit të Republikës së Shqipërisë në Maqedoninë e Veriut, Sh.T.Z. Denion Meidani, deputetja e Bashkimit Demokratik për Integrim, Rina Ajdari, së bashku me koleget deputete shqiptare, realizoi një takim në Shkup me Ministren për Evropën dhe Punët e Jashtme të Republikës së Shqipërisë, Sh.S.Znj. Elisa Spiropali.
Gjatë takimit u diskutua mbi forcimin e bashkëpunimit ndërinstitucional ndërmjet Maqedonisë së Veriut dhe Republikës së Shqipërisë, si dhe mbi rolin e dialogut politik në ndërtimin e mirëbesimit dhe avancimin e proceseve integruese evropiane.
Deputetja Ajdari theksoi rëndësinë e shkëmbimit të përvojave dhe koordinimit të vazhdueshëm mes institucioneve të dy vendeve, duke vlerësuar se bashkëpunimi rajonal mbetet kyç për stabilitetin politik, zhvillimin demokratik dhe përmirësimin e pozitës së shqiptarëve në rajon.
Takimi u zhvillua në një frymë konstruktive, me fokus në sfidat aktuale dhe në ide konkrete për thellimin e bashkëpunimit politik dhe diplomatik mes dy shteteve.
Ja postimi i plotë:
Me ftesë të Ambasadorit të Republikës së Shqipërisë, Sh.T.Z. Denion Meidani, bashkë me koleget deputete shqiptare, në Shkup patëm nderin të zhvillojmë takim me Ministren për Evropën dhe Punët e Jashtme të Republikës së Shqipërisë, Sh.S.Znj. Elisa Spiropali.
Në frymën e dialogut dhe bashkëpunimit, ndamë përvoja, sfida dhe ide konkrete se si mund të ndihmohen proceset politike duke ndërtuar ura komunikimi dhe mirëbesimi ndërinstitucional ndërmjet Maqedonisë së Veriut dhe Shqipërisë.
